Ватан дуруччайманал кьинилун хасну Лакрал райондалул кIулшиву дулаврил ва магьирлугърал идарарттай хьунни мероприятияртту.
Дайдирхьунни ми февральданул 21-нний Гъумучиял школалий Ватан дуруччайманал шин тIитIаврийну.
Ва патриот зумунусса ишираву гьуртту хьунни райондалул администрациялул ва идарарттал, аьралий комиссариатрал зузалт, Авгъаннавусса дяъвилул гьурттучитал, хIакьину хасъсса аьралий операциялий гьурттушинна дуллалими, учительтал ва дуклаки оьрчIру.
Дайдирхьунни мероприятие школалул хIаятравусса Аьпалул багъраву бацIан бувсса хасъсса аьралий операциялий ватандалул мурадру буруччаврил ххуллий чувшиврий жанну дуллуминнан цIа кусса чарицI тIутIив дишаврия.
Хъирив хъамаллуран ккаккан дунни школалул жанахIраву дирхьусса 4-11-ми классирттал дуклаки оьрчIал сочиненияртту, цала тухумравасса ватан дуручлачиминнан хас дурну чирчусса.
Школалул директор Соня Макьаевал бусаврийн бувну, вай сочинениярттал гьанулий классирттаву дирхьуну дур классный часругу.
Муния махъ ххал бунни дуклаки оьрчIал хIадур бувсса Аьпалул чIира. Ванийн лархъун дур дуклаки оьрчIал цала кулпатрал архиврава ларсун бувкIсса 250-ннийн дирсса суратру. Вай дакъаминнал чирчуну дур укунна цIарду. Бувсунни ва чIира гьарза-гьарта буллан тIий бушиву ванияр гихунмайгу. Мичча мероприятиялул хъамал бувкIуна актовый залданувун.
Соня Макьаевал, бавтIминнахьхьун ссаламгу буллуну, бувсуна Аьрасатнал президент Владимир Путиннул хIукмулийн бувну 2025-ку шин жула билаятрай баян бувну бушиву Ватан дуруччайманал шинну.
«Гьашинусса шин Ватан дуруччайманал шинну баян баву хъинну тIайласса хIукмур, Буттал КIанттул цIанийсса Хъун дяъвилий Бюхттулсса Ххувшаву ларсун 80 шинал юбилей кIицI лаглагисса шин Ватан дуруччайманал шинну баян баврил агьамшиву хъуннассар. Шинал манзилданий жува кIицI лаглантIиссару Ватандалул ххуллий жанну дуллуминнал аьпа», – увкунни ванил.
Райондалул бакIчи Юсуп МахIаммадовлул Ватан дуруччайманал шин кIицI ларгунни жула Ватандалул виричушиврун ва тарихрал цIанихсса аьдатирттан хас бувсса ляличIисса ишну.
«Ва шин хас дурссар цинявппагу вирттавран: хасъсса аьралий операциялий гьуртту хъанахъиминнан ва тарихрал личIи-личIисса заманнай Ватан дуруччаврил ххуллий талай бивкIсса жула ппухълуннан. ХIакьинугу жула дакIурдиву буссар гьарца заманнул вирттал. Бюхттулсса талаталтрал аьпа ябаврицIун жува кьиматрай никирая никирайн буллалиссару тайннал виричусса ирс. Хъун хъанахъисса никиран кIулну бикIан аьркинссар цукунсса багьлун дарцIуссарив жула ппухълуннан ххувшаву. Бюхъайссаксса чIявусса буслан аьркинссару жува тай цалархIал оьсса ва виричусса шиннардия», – увкунни Юсуп МахIаммадовлул.
Авгъаннал дяъвилул гьурттучи, запасрайсса подполковник ХIусман Маммаевлул бувсунни тай иширттая. КIицI лавгунни гьарцаннал хьхьичIсса бурж хъанай бушиву дакIниву ядаву ватандалухсса ччаву, ватандалул ххуллий жанну дуллуминнал аьпа, хIакьину ватандалул мурадру буручлачиннал хIурмат. ЧIа увкунни жула ппухълуннал кунна захIматшивурттал хьхьичI бакI лахIан къадуван, тарихраясса кIулшивуртту куртI дуллан.
Хасъсса аьралий операциялул гьурттучи Альберт Шяъвановлул чIа увкунни дуклаки оьрчIан билаятрал хIакьсса патриотътал хьун. Барчаллагь увкунни райондалул каялувчитурахь, хасъсса аьралий операциялий талатиминнах дуллалисса къулагъасрахлу.
Дуклаки оьрчIал дурккунни вирттавран хас дурсса назмурду, увкунни балайрду, ккаккан бунни аьралий иширттацIун бавхIусса сценкарду. Ккаккан дунни Буттал КIанттул цIанийсса Хъун дяъвилул ва хасъсса аьралий операциялул темардан хас дурсса видеороликру.
Юсуп МахIаммадовлул барчаллагь увкунни школалул директорнахь, педагогтурахь ва дуклаки оьрчIахь, ларайсса сакиншиндарай хIадур дурсса мероприятиялухлу.
КIицI лавгунни ва журалул мероприятиярттал агьамсса кIану бугьлай бушиву хъун хъанахъисса ник ватан ххирану тарбия даврил ххуллий.
Бувсунни цува, махъ бакъа, хIайранну ливчIун ушиву школалий ватан ххирашиврул ххуллийсса давуртту лавайсса даражалий най душиву исват хьувкун.
«Яла-ялагу асар хьунни Аьпалул чIира сакин бан дуклаки оьрчIал ва педагогтурал бувсса захIмат. Гьарцагу дуклаки оьрчIал ва чIирайн лахъан дурну дур Буттал КIанттул цIанийсса Хъун дяъвилул цIаравух бувксса, мунил хIасратру дурхIуну, жула билаят ва щалва Европа немец-фашистътурал чанхунчитурая ххассал бувну, бюхттулсса Ххувшаву гъан дуллай бивкIсса цала ттаттахъал суратру.
Аьпалул чIира – дуклаки оьрчIал ва педагогтурал Ватан душманная мурахас дурсса цала гъан-маччаминнал аьпалул хIурматри. Гай уттавассар жунма дакIний буссаксса», – увкунни Юсуп МахIаммадовлул.
