Москавлив вузирдаву марцIну ххювардай дуклакисса жула студентътуран Дагъусттаннал бакIчинал стипендия буллалисса шадлугъ хьунни. Ва гьар шинах дувайсса мероприятияр. Гьашину 18 вузраву дуклакисса, дуккавриву ва элмийсса давурттаву хьхьичIунсса 48 студентнан бивхьунни стипендия.
Шадлугърал дайдихьу дуллалисса махъ лахълай, Постпред Владислав Толстюклул кIицI лавгунни, Дагъусттаннал бакIчинал стипендиант лахъсса статус хъанахъишиву, республикалун дурккусса, даврил бюхъу бусса пишакартал аьркинну бушиву, вузру къуртал байхту, выпускниктал Ватандалийн зана шаврих ялугьлай бушиву. Ванал маслихIат бунни студентътуран гихунмайгу хIарачат буллан, ларайсса кIулшивуртту ласаврий гьашиву къадурну, элмийсса хъиривлаявурттавух ва цаймигу билаятран мюнпатсса давурттавух хIала бухлан.
– Хъуннасса ххаришиву дикIай хьхьичIунсса студентътуравух мудан лакгу буну. Гьашину Дагъусттаннал бакIчинал стипендиатътураву 48 студентнава 8 лакраясса ур. Шама студентнан Москавливсса лакку диктантрай «Дараччилул» чулухасса арцуйнусса премиярттугу дуллуссия фондрал хъунмур Гульшан Хасаевал. Вайннан хъинну бусравгу хъанахъиссар, дуккаврихсса гъира-шавкьгу ххи хъанахъиссар, – увкунни Постпреднал маслихIатчи Зоя Хановал. Ванил тавакъю бунни, нитти-буттахъул, Ватандалийсса учительтал, мачча-гъанми ххари буван, вай 8-гу студентнал цIардугу, суратругу кказитрайгу дуларакьай куну. Вайнна студентътурал цIарду: Муслимлул арс Калаев Саид, юридический факультетрал 4-мур курсрал студент, Аьрасатнал паччахIлугърал правосудиялул университет (ФГ БОУ ВО «РГУП»); Макьсудлул арс ХIабибуллаев Рамазан, лечебный факультетрал 6-мур курсрал студент, Н.И. Пироговлул цIанийсса медициналул университет (ФГАОУ ВО «Российский национальный исследовательский медицинский университет им. Н.И. Пирогова»); Рамазаннул арс ХIусайнов Ислам, лечебный факультетрал 6-мур курсрал студент (ФГБОУ ВО «Аьрасатнал медициналул университет»); Артурдул душ Аьлиева Алина, историялул ва политологиялул институтрал 5-мур курсрал студентка; Артурдул душ Аьлиева Залина, вава институтрал 5-мур курсрал студентка (ФГБОУ ВО «Москавуллал педагогикалул паччахIлугърал университет); АьбдулхIамидлул душ Багъирова Рукьижат, дунияллул халкьуннал дянивсса арардал факультетрал 3-мур курсрал студентка (ФГАОУ ВО «Аьрасатнал МИД-рал Москавуллал паччахIлугърал дунияллул халкьуннал дянивсса арардал университет»); Муртазааьлил арс АхIмадов Макьсуд, прокурорско-следственный факультетрал 4-мур курсрал студент (ФГКВОУ ВО «Князь Александр Невскийл цIанийсса аьралий университет); Пайзуллал душ МахIаммадова Лаура, прикладной математикалул ва информатикалул факультетрал 1-мур курсрал магистранка (ФГБОУ ВО «Москавуллал авиациялул институт (МАИ).
Жугу дакIнийхтуну барча буллай буру циняв студентътал, чIа тIий буру зун дуккавривугу, оьрмулул ххуллийгу тIайлабацIу.
ПатIимат Рамазанова
