Аьрасатнал аьраличу, «Витязь» спецназрал штурмовой группалул командир Дмитрий Серков увну ур 1981-ку шинал Рязаннай. Аьралуннаву къуллугъ буллан ивкIун ур 1999-ку шиная айивхьуну.
2004-ку шинал къуртал бувну бур Аьрасатнал МВД-лул виваллил аьралуннал Санкт-Петербургуллал аьралий институт. Къуллугъ буллай ивкIун ур «Витязь» спецназрал кьюкьлуву. 2005-2007-ку шиннардий гьуртту хьуну ур Ухссавнил Ккавкказуллал региондалийсса террорданийн къарщисса операциярттаву.
2007-ку шинал майрал 31-нния июньдалул 2-ннийн бияннинсса гьантрай капитан Серковлул каялувшиндарай усттарну бувсса операциялуву бувгьуну бур УнцIукIуллал райондалийсса Балахини шяравусса боевиктал.
2007-ку шинал август зурул 2-нний Сергокъалаллал райондалий, Кьадиркент шяраваллия арх бакъасса кIанттурдай, боевиктуращалсса талатавриву, канийн щаву дирнугу унува, аьралий гьалмахтал талатаву къизгъинния махъаллил хьуннин, цана цувалу къачагътурайн данди авцIуну, жан дуллуну дур.
Оьрмулун нигьачIисса шартIирдай къуллугърал бурж бартбигьлай ккаккан дурсса чувшиврухлу, аьпалул хьуну махъ, ванан дуллуссар Аьрасатнал Виричунал цIа.
Дмитрий Серковлул цIа дирзун дуссар ЦIуссалакрал райондалийсса Шушиннал школалун. Школалул хIаятраву дацIан дурну дуссар гьайкал.

Андриана Аьбдуллаева