Мариян Ильясовал цIанийсса «Дараччи» ихIсандалул фондрал ва Москавливсса филиалданул душваврал цимилагу гьан бувссар хасъсса аьралий операциялийсса аьралитуран гуманитар кумаг, цимилгу бивссар щавурду дирну госпитальлайн багьсса ватанлувтурачIан.
Уттигъанну Москавливсса «Дараччи» фондрал филиалданийн увккунни захIматсса щавурду дирну, Москавуллал 2-мур госпитальданий хъин хъанахъисса дагъусттанчу Нурислан Наврузов. Ванан аьркин дагьлай диркIун дия багьлул ххирасса электроколяска. Душваврал га цIана биян бунни аьраличунал тавакъю «Дараччи» фондрал президент Гульшан ХасаевачIан.
Ванил оьвчаву дурну, гьар мудан кунма, мугьлат бакъа щаллу бан бювхъунни масъала. Халкьуннал Мажлисрал депутат Марат Илиясовлул (50 азарда къуруш) ва «Дараччи» фондрал душваврал цала чулуха дуллумур (30 азарда къуруш) цачIу дирхьуну, Нурисланнун ларсунни 79 азаллий 900 къурушрансса электроколяска.
Вагу диян дан, нахIу дукрардугу ларсун, аьраличуначIан лавгунни «Дараччи» ихIсандалул фондрал Москавливсса филиалданувасса душру Ххадижат ЦIаххаева, Басират Билалова, ПатIимат Садикьова, Шавлухъ Илиясова ва Сайбат Аьлиева.
– На дакIнийхтуну барчаллагь тIий ура ва захIматсса тагьарданий ттула чIарав бавцIусса, ттула тавакъюгу кьамул бувну, ва ххаллилсса бахшиш дурсса цинявннахь. Зул каши-кьудрат муниярдагу ххишала хьуннав. Жува чара бакъа ххув хьунтIиссару, – увкунни Нурисланнул.
Гульшан Хасаевалгу цила чулуха барчаллагь увкунни Марат Илиясовлухь, ва давриву гьурттушинна дурсса, аьраличуначIан бивсса жула душваврахь.
Андриана Аьбдуллаева
