Ниттихъал байрандалун хас дурсса мероприятие хьунни ЧIяйннал шяраву. Ва байран кIицI лагаврил сиптачину бувккунни Магьирлугърал къатрал хъунмур СалихIат Алхасова. Шикку гьуртту хьун оьвкуну бия чIявусса оьрчIру бусса ниттихъайн ва хасъсса аьралий операциялул гьурттучитурал ниттихъайн. Вайннавух бия аьралий операциялул гьурттучинал нину Лиза Кьубатаева, Ккуллал райондалул КЦСОН-далул методист Сусанна Бугъраева.
Мажлис тIитIлай, ниттихъул барча буллалисса ихтилат бунни СалихIатлул.
– Жура кIицI лагару личIи-личIисса байранну. Амма дунияллийсса гьарицагу инсаннан яла ххаримур ва ххирамур байран духьунссар Ниттихъал байран.
Ниттихъал байран шинай цал кIицI лаглай бунугу, Аллагьнал жунма дунияллий итабавкьусса гьарицагу гьантта ниттихъал кьинину ккалли бан бучIир. Ниттихъай дарцIуну дур дуниял, ужагъравусса чанигу, гъилишивугу ниттия най дур. Жула оьрчIру хьуну махъ жунма хъиннува бувчIай, ниттихъал жува хъуни буван, ччаннай бацIан буван, хьхьурду уттара дурну бивхьусса захIмат.
Ххирасса ниттихъул, барча т1ий бура зул байран, чIа тIий бура цIуллушиву, талихI, тирхханну. ХIакьину зу тарбия бувсса оьрчIая ва душваврая хьхьичIунсса, ххаллилсса инсантал хьуну бур. Зу кунмасса ас-намус бусса, уздансса, аькьилсса ниттихъалли бувасса цIакьсса, нахIу-хIалимшиву дусса кулпатру. Зун зула оьрмулуву ккарксса захIматшивуртту, пашманшивуртту хъама дитан дансса ххаришивуртту ялун дияннав, ва хIакьинусса кьини хасъсса аьралий операциялий гьуртту хъанахъисса жула цинявппагу оьрчIру цIуллуну-сагъну ужагъирттайн зана хьусса чIун дучIаннав, – увкунни СалихIатлул.
Хасъсса аьралий операциялий арсру гьуртту хъанахъисса ниттихъал чулуха махъ лавхъунни Лиза Кьубатаевал.
– ХIурмат лавайсса ниттихъул, ссурвал. БувчIлай бур хIакьину цуксса захIматну буссарив аьралий операциялий гьуртту хъанахъисса арсваврал ниттихъан, кулпатирттан. Барчаллагь къучагъсса арсру тарбия бувсса ниттихъан. Ччясса мутталий хасъсса аьралий операциялул ахиргу хьуну, оьрчIру цала-цала нитти-буттачIан, кулпатирттачIан цIуллуну-сагъну зана хьуннав, – увкунни Лизал.
Ихтилатирттал лях-карах ниттихъан хас бувсса шеърирду бувккунни дуклаки оьрчIал.
Цахара дурсса аякьа асар хьусса ниттихъалгу дакIнийхтуну барчаллагь увкунни мажлис сакин бувминнахь.
Имара Саидова
