Дагъусттаннай мудангу аякьалий ва хIурмат-кьиматрай бу­ссар жула ниттихъул, ссурвал ва душру. Вай гьантрай, мунинсса барашиннану хьунни Дагъусттаннал панкратиондалул цачIун дур командалул хъунама тренер, МахIачкъалаллал 49-мур школалул директор Аьбдулкарим Айгуновлул сипталийн бувну, ниттихъал байрандалун хасну бувсса мажлис. Ванащал нитти­хъул барча бан увкIун ия Къизляр шагьрулул Мажлисрал депутат МахIаммад Халидов.

Байрандалийн оьвкуну бия кIулшивуртту дулавриву хъунмасса захIмат бивхьусса, цала-цалами оьрчIругу эбратну тарбия бувсса, яхI-къириятрай оьр­му бувтсса ниттихъайн. Миннавух дия, ххаллилсса арс Муслим Даххаев тарбия увсса, ванал нину Аминат Даххаева, МахIачкъала шагьрулул 20-мур школалул директор Анжела Мурзаева, 5-мур лицейрал директор ПатIимат ХIусманова, «Илчи» кказитрал журналист Имара Саидова ва цаймигу.

– Ххирасса ниттихъул, дакI­нийх­туну барча т1ий ура зул байран! Ниттихъал кьини кIицI лагаврил мурадгу хъанахъиссар хъанниха хIурмат баву, кулпатру буруччаву ва жула оьр­мулуву ниттихъал агьамшиву чIалачIи даву. Ва хIакьинусса хьунабакьаврилгу, зу зула гьармуданмасса къайгъурдая чансса-бунугу бигьалаганссару, ххари банссару тIисса умудрай ура. ХIакьину жучIанма хъамалу оьвкусса ниттихъул мяйжаннугу лайкьну оьрму бувтсса, цинявннан бусравсса, ххаллилсса инсантал бур. Къатта-къушгу бачин бувну, хIукуматрал давурттайгу зий, оьрчIругу ччаннай бацIан буллай, зу бивхьусса захIматран багьа бакъассар. Зу кунмасса ас-намус бусса, уздансса, аькьилсса ниттихъалли хIасул бувсса цIакьсса, нахIу-хIалимшиву дусса кулпатру.

ЧIа тIий ура зун цIуллушиву, талихI, тирхханну, дунияллий дакьаву, – увкунни Аьбдулкарим Айгуновлул.
Ва кьини ниттихъан Аьбдулкаримлул ва МахIаммадлул пиш-каш бунни, цаннияр ца авур­сса тIутIал кIацIру ва дакIний личIансса бахшишру.
Цахара дурсса аякьа асар хьусса ниттихъал дакIнийхтуну барчаллагь увкуна Аьбдулкаримлухь ва МахIаммадлухь.

Имара Саидова