ЧIаланну баххана хьунни замана. Жула оьрмулул, производствалул гьарица сфералувун дурххунни ттизаманнул цифрардал технологияртту. Жагьилминнан бигьану бухьурчагу цифрардал заманнай щурун, цамур чIумуй вардиш хьусса оьрмулул хъуниминнан бигьану бакъар. Ци чулийгу, цифрардал ттуршуку дуниял хьхьичIуннай шаврин, общество лаваймур шачIанттуйн лахъаврин ккаллисса иш бур.
Цифрардал технологиярттая, заманалуцIун бавхIусса масъаларттая ва цаймигу иширттая цIухху-бусу бан жу оьвчарду редакциялийн хъамалу Дагъусттаннал Цифровой развитиялул министрнал хъиривчу, «Илчи» кказитралгу хъинсса дус Бадруттин МахIаммадовлуйн.
– Бадруттин Аьлиевич, байбихьулий кутIану виятува бусарча ччива. Та, цукун бахIав ина вила оьрму цифрардал технологиярттацIун?
– На увну ура МахIачкъалалив. Ттул ппу Аьли Инишиял шяравассар. Нину Гюльназ Шалиясса. Ппу физик ия, нину машлул зузала. МахIачкъалаллал 39-мур школа къуртал байхтува ттун ччан бивкIуна ттула оьрму цифрардал технологиярттацIун бахIин, На увхра Дагъусттаннал университетрал физикалул факультетрайн. Ва факультет язи бувгьуссия буттангу ччай тIий. Му ппурттуву тикку вычислительная физикалул ва информациялул кафедрагу тIивтIуну бия, мунийнугу ттун бахтти хьунни. ХIакьинусса кьинигу буттайн барчаллагьрай икIара нава ва ххуллийн тIайла ацIан увну тIий. Физика караматсса элму дур.
Университет къуртал бувну махъ личIи-личIисса давурттай зий уссияв: Дагъусттаннал Судрал департаментрал управлениялий хъунама пишакарну, Дагъусттаннал Геологиялул информациялул фондрай директорнал хъиривчуну, МахIачкъалаллал администрациялул Информатизациялул управлениялул хъунаманал хъиривчуну. Цаппара шиннардий зий уссияв Москавлив. Дагъусттаннайн зана хьуну махъ зун ивкIра паччахIлугърал ва муниципал структурардаву. 2012-ку шинал Майкрософт компаниялул региондалул вакилну, 2014-2018-ку шиннардий МахIачкъалаллал администрациялий Информациялул технологиярттал управлениялул хъунаману, 2018-2021-ку шиннардий Дагъусттаннал информатизациялул, связьрал ва массовый коммуникациярдал министрнал хъиривчуну, 2021-2023-ку шиннардий Дагъусттаннал университетрал проректорну. Вай шиннардий чичлай айивхьуссияв Университетрал даврил автоматизациялуцIун дархIусса диссертация, мажал бакъашиврул дачIиннуй лирчIунни. Умуд бур мунийнгу яржа биянссар тIисса. Буттангу ччай бикIайва на элму ахттар дурну.
2004-ку шинал март зуруя байбивхьуну цIанасса чIумалнин на ура Дагъусттаннал цифровой развитиялул министрнал хъиривчуну.
– Ина зузисса идаралуцIун, вил пишалуцIун бавхIусса агьамсса иш хьунни махъсса кIира шинал дянив Дагъусттаннай. Аьрасатнал Цифрардал министерствалул кабакьулийну жучIара кIийлла хьунни Дунияллул халкьуннал дянивсса Каспийскаллал цифровой форум. Хьуссарив муния цичIав мюнпат, дузрайн дуркссарив микку хьхьичIун ларсъсса царагу проект?
– КIирагу форум мяйжаннугу мюнпатсса хьуссар, аьркинсса проектру кьамул дурссар. ТIайлассар, цалчинмур форумрал чIумал хъуннасса чIун зерххуна хIадуршиннарал, сакиншиннарал масъаларттал. Жун цимилагу федерал даражалул коллегахъайн буккан багьуна цалийн бучIаву мурадрай. Форум дунияллул халкьуннал дянивсса духьувкун, жуламиннайн бакъасса, чIявусса дунияллул даражалийссагу экспертътурайн буккан багьлай бия, гьуртту хьун ччисса чIявусса бия. Мукун цахъи лахъи ларгуна. Уттими проектирттал хIакъираву ччяни маслихIат ккаккан хIарачат банну. Ларгмур форумрал материаллаву чIярусса лаласунсса тезисру ва проектру дия Аьрасатнал, Дагъусттаннал Къазахъисттаннащал, Ираннащал цачIу щурущи дансса. Ми гьарзат хIисавравун ларсун, гьашину ми дузрайн дуккан дансса резолюция щаллу дантIиссар. Проектру хъунисса лагрулул душиврийн бувну, миннул ялув зун аьркинну бушиврийн бувну, мугьлат бакъа щаллу дан хъанай дакъахьурчагу, зий буссару. Дагъусттаннан стратегиялул чулухагу къулайссар вай проектру жулва площадкарттай ххалдигьлагьаву. ЧIал къавхьуну ца форум ттигу хьунтIиссар. Умуд бур мунил лагрулий ххалдигьинссар кIицI ларгсса проектру тIисса, миннувух жула республикалий дузрайн дуккан дуллантIимигу.
– Проектру дузрайн дуккан дан инвестортал кIункIу буллалиссарив? Щил итадакьлакьиссар миннунсса арцу?
– ЦIана жу ми дузрайн дуккан дансса арцу Москавливгу, региондалийгу ляхълантIиссару. Проектраву гьуртту хьун ччиминная цинявнная тIалав бантIиссар арцуйнусса кумаг. Форумрай хъуннасса къулагъасрайн ларсун ххалдиргьуна Дагъусттаннай кIулшивуртту дулаврил платформа IT-хаб зузи даврил проект. Жу му республикалул бакIчинал повесткалийн ласарду, Аьрасатнал чил билаятирттал министерствалул тапшуршинна хIисаврай. Федеральный ва региондалул бюджетрава му щаллу дансса чаран лякъин тапшур барду. Ва проект дузрайн дуккарча, хъунмасса мюнпат бикIантIиссар. ЖучIава тIитIинтIиссар шинал лажиндарай зузисса кIулшивуртту дулаврил лагерь. Частный инвестортал хIадурну бур мунинсса къатри дан. Шикку гьарта-гьарзасса кIулшивуртту дулайсса программалий зунтIиссар, гьарица кIанттурдая шиккун дуклан занантIиссар, жулами оьрчIащагу цания ца программа язи дургьуну дуклан хьунтIиссар.
– Ца проект дузрайн дуккан дан цуксса чIун аьркинссар?
– Ва дахьра кIилчинсса форум дур. Ттул пикрилий, проект щаллу дан хъуннасса чIун къагьанссар. Ца ягу кIира шин. Цанчирча, ирглийсса форумрай дурмунил отчет дулун аьркинссар. Вай иширттаву хъунмур чIун цалийн букIлай харж хъанай дур.
– Зунттавусса жула Лакрал, Ккуллал районнай цифровизациялул, телефондалул связьрал, интернетрал тагьар цукунсса дуссар?
– Дагъусттаннай сайки гьарица кIанай (90% ливчусса кIанттурдай) сотовая связь зий дуссар. Цайми регионнах бурувгун, жучIарасса тагьар къаоьккиссар. Интернет дуссар щалагу республикалийсса агьамшиву дусса социал объектирдай, администрациярдай, школардай, ФАПирттай, полициялул пунктирдай. Интернет дурцуну дуссар гьарица шяравун. КIанттул оператортураща бюхъайссар му къатравун дуцин. Лакрал, Ккуллал районнайсса тагьардания тIурча, ттул пикрилий, шикку тамансса давуртту дан багьлай бур. Гьарица паччахIлугърал идаралул дикIан аьркинссар цила официал страница «В контакте» сетьраву. Социал страницардаясса чанссарагу тIалавшиннарду къадурурччусса кIанттурду хьунабакьлай бур. Идарартту сияхIрайн ласун аьркинну бур. ХIасил, му чулухуннайсса давуртту дуллан багьлай бур.
– Аьрасатнал цайми регионнай куннасса хIаллихшиннарду – госуслуги дуллалиссарив жулла республикалийгу?
– Федерал даражалийсса, электрон журалий ккаккан дурсса циняв госуслуги жучIарагу дуллалиссар. Амма электрон журалий дурсса хIаллихшиннарду чIумуя чIумуйн ххишала хъанан аьркинссар.
Инсаннаща шава щяивкIун унува телефондалийхчин щаллу бан бюхълай бур цала масъала, амма жулва инсантал ттигу мунийн вардиш хьуну бакъар. Цифровой технологиярттая жунна хъуннасса бигьа-рахIатшиву дуссар ми кIулну духьурча. Хъинну къулайсса дур, масала, платформа обратной связи. Агьалинаща цала масъалалия чивчуну, жаваб ласун бюхъайсса хIаллихшинна. Госуслугардаву дур «Решаем вместе» тIисса приложение. Инсаннал миккун чивчумур тIайла байссар ми масъаларттаха зузисса органдалийн. Закондалий ккаккан дурсса чIумул дянив му масъала щаллу байссар. Агьалиная бувкIсса аьрзлул ялув бацIаву дуллалиссар республикалул бакIчинал ва ХIукуматрал администрациялул, муниципалитетирттал ва хасъсса органнал. Ва Госуслугардал приложениялийхчин щаллу бан шайссар ччимур масъала.
– 5G сотовый связьрал вышкардая хъуннасса радиация дуссар тIун бикIай. Му цуксса тIайлассар? Дуссарив жучIара мукунсса вышкарду?
– ЖучIара царагу 5G вышка дакъассар. Му я дихьлай, я дишин ччай къабивкIссар, цанчирча му хъинну захIматсса ва ххирану дацIайсса даву дур. ЖучIара ишлану дуссар 4G.
– Ци учин ччива ихтилат къуртал буллай?
– Ца- кIива махъ учивияв миллатрал прессалул хIакъираву. Ххишаласса къулагъас ччива госпабликирдал, сайтирдал даврих. Балики, жагьилминнавун гъира багьансса контент лякъин. Уттигъаннугума пикри буллай уссияв, хъунисса машлул точкардащал (05 ru, Киргу) икьрал дурну, кказитрай цукунсса дунугу QR-код ягу купон рищурча, клиентнан скидка дуллалисса, ххуйну хьунссия тIий.
Цамургу, уттигъанну жула сипталий дурсса «Живая фотография» тIисса цIушинна. Приложение телефоннайн лахъан дурну, телефон суратрах, шакилданух дурган дарча, га «сагъ хъанай, гъалгъа тIий дуссар». ДуккантIиссар суратрачIансса видеоролик. Ва проект зузи дарча, кказитрахсса гъира ххишала хьунссия, буккулт гьарза хьунссия. Зул даврин ттущава шайсса кумаг бан нагу хIадурссара.
– Барчаллагь, Бадруттин Аьлиевич, ххуйсса ихтилатрахлу ва мюнпатсса маслихIатирттахлу.
Ихтилат бувссар
Андриана Аьбдуллаевал
