Ларгсса ххуллун кьини МахIачкъалаллал бакIчи Муса Мусаевлул шагьрулий бакьин буллалисса ххуллурду ва хIаятирттаву, кIичIирттаву паркирдаву цуку-цукунсса давурттив дан дурив ххал дан ялтту увккунни.
БакIчинащал архIал бия ванал хъиривчутал, шагьрулул администрациялул отделлал каялувчитал, Кировский райондалул бакIчи, «Горзеленхоз» МП-рал ва «Эко-М» ООО-рал хъуними.
Цала даврил аьрххигу вайннал байбивхьунни Редукторный поселокрай буллалисса сквердания. Шиккува дакIнийн бутан, Петра I-ccа кIичIираву ва сквер буван шагьрулул бакIчинан дакIнийн багьссия цува дахьа ивтун, шагьрулул ялтту уклакисса ппурттуву. Сквер буллай байбишиннин шикку буссия ццунсса къатIравун, мурхьирдавун тавтсса, чIаравсса къатраву цаппара яхъанахъиминнал ччюрк дичлачисса, щилкIуй ургъил-къулагъас дакъасса кIану. Танийва Муса Мусаевлул хIукму бувссия шиччалу марцI бувну, ттарлил, кIалахIилул мурхьру, тIутIив дургьусса, скамейкарду бивхьусса, ккаккия хьусса сквер бувансса. Ванил лагма бур азарахъул инсан яхъанахъисса, №41, 43, 45, 47, 49, чIярузивурду дусса къатри. Сквер буллай байбишиннин цал марцI дурну, дукьан дурссар вай къатрал чIаравсса пристройкарду. Яла байбивхьуссар, бухсса мурхьру ххуку бувну, ччюрклицIа марцI буллай. ЦIана тIурча дурну дур тамансса давурттив: бувгьуну бур мурхьру, бакьин бувну бур халкь занансса ххуллурду, бивхьуну бур чани буцинсса тталлу, чуллах дирхьуну дур муххал авурсса чапарду, бувну бур беседкарду, дирхьуну дур урнарду, чIал къавхьуну тIутIив дугьлай байбишин тIий бусса бур.
БакIчинал тавакъю бувунни давурттив анавар дуккан дан, мартрал 25-нний сквер тIитIлатIисса шадлугъ дуван тIий буну тIий. Шиккува Муса Мусаевлул ххал дурунни къатрал, хIаятирттал марцI-чапалшиврул тагьар, бувунни шивах яхъанахъисса халкьуннащал ихтилатругу.
Хъирив бакIчи ивунни «Ак-гель» бярничIасса паркравун. Ххал бувунни воркаут буллалисса кIану ва амру бувунни ччясса мутталий, аьркинсса спортинвентарьгу ларсун, ва кIанайх хасъсса резиндалул материал ялтту дакьлай байбишин. Мукунма Муса Мусаевлул тIалав бувунни паркравусса циняв коммерциялул объектру ххал бувну, ми налограл сияхIрайн ласун. Хъирив шагьрулул бакIчи ивунни Булачлул цIанийсса кIичIиравун. Шикку ванал марцI-чапалшиврул хIакъиравусса аьй-бювкьу дурунни ттучаннал, коммерциялул идарарттал заллухъруннай. ТIалав бувунни вайннайн оьвкуну, цалва-цалва кIанттурдал лагма-ялтту лакьлакьи бан.
Хъирив Муса Мусаев «1000 мелочей» микрорайондалийн ивну, шикку давурттив щурущи дувансса кIанттурдал ялтту увккунни.
ЦIинцI-ччюрк дичинсса контейнерду бивхьусса кIанттурдай низам дакъашиврия къарязисса бакIчинал мукунна аьй дурунни ва масъалалул жаваблувминнайн. Амру бувунни Кировлул цIанийсса кIичIиравусса мурхьирдай жалгъарду бувну, тталлай чани цIубан ва скамейкарду бишин.
