Билаятрайн кьини дурксса ппурттуву ЦIуссалакрал райондалиясса цикссагу жагьилтурал ккаккан бунни Ватан дуруччин хIадурну бушиву. Аьралий бурж лавайсса даражалий бартбигьлай ккаккан дурсса чувшивурттая, лайкь дурсса наградарттая чичлайнма буру жула кказитрай. Аьрщарайсса паракьатшиву дуруччаврил цIаний нигь-ццах бакъа талатисса къучагътуравасса, жагьилсса никиран эбратрансса виричу ур ЦIуссалакрал шяравасса Шамил Баймурадов.
Украиннал аьрщарай хасъсса операция байбивхьуния шийнай Шамил гьуртту хъанай ур аьралий иширттавух. Ва цувагу мобилизация дайдирхьусса ппурттуву, хушрай лавгун ур хасъсса аьралий операциялий гьуртту хьун.
Увну ур Шамил 1995 шинал ЦIуссалакрал шяраву. ЦIуссалакрал 1-мур школагу хьхьичIунсса хIасиллай къуртал бувну, дуклан увххун ур Воронеж шагьрулийсса Аьрасатнал МЧС-рал институтравун.

Хасъсса операциялий гьуртту хъанахъисса хIаллай лайкь хьуну ур ПаччахIлугърал ва ведомстварттал наградарттан. Шамил Баймурадовлул исват бунни цува кьянкьасса низам дусса, унгу-унгусса патриот ушиву.
Аьралий бигарду къучагъну бартбигьаврихлу, вай гьантрай Шамил Баймурадовлун дуллунни «Дагъусттаннал халкьуннал Виричу» тIисса бюхттулсса цIагу, Мусил цIукугу.

Имара Саидова