Вай гьантрай ЦIуссалакрал райондалул бакIчинан кIанайсса Султан Хамзатов хьунаавкьунни хасъсса аьралий операциялий жанну дуллусса Нагбаров Муртазаьлил ва ХIасанбагов Максимлул кулпатирттащал.
Аьралитурал гъан-маччанайн оьвкунни райондалул администрациялийн. Шикку миннахьхьун дуллунни аьралитурал лайкь дурсса Къучагъшиврул орденну.
– Зул ялун хъуннасса кьурчIишиву дирссар. ЦукунчIавсса мукъурттийну куклу дан къахьунтIиссар зул къюву. Зул арсурваврал, ласурваврал жанну дуллуссар Ватандалул мурадру, мюхчаншиву ва цашиву дуручлай, ялун нанисса никиран паракьатсса оьрму дузал буллай. Жун мудангу дакIний дикIантIиссар вайннал чувшиву, тачIавгу къакьабитантIиссару зу къулагъас дакъа. Зун гьарица чулуха кумаг баву – властьрал циняв структурардал хьхьичI ххуттайн лавсъсса масъалар, – увкунни С. Хамзатовлул. Хасъсса аьралий операциялул гьурттучитуран кумаг бансса чаранну лявкъунни федерал властирдал. Ми щаллу буллай бур регионнай ва муниципалитетирттайгу. ХIакьинусса кьини муниципалитетирттал дуллай бур участокру хасъсса аьралий операциялул гьурттучитуран, райондалий хъуннасса даву дурну дур СВО-лий жанну дуллуминнал аьпа абад бан: дирхьуну дур мемориаллал ултти, къучагътурал цIарду дирзун дур школардан ва кIичIираваллан. Вай давуртту уттиния тихуннайгу дуллантIишиву бувсунни райондалул бакIчинан кIанайманал. Ванал ва аьралий комиссарнал цайнма лавсунни аьралитурал гъан-маччаминнал шикаятру щаллу баврил масъала. Ми бия ялапаршиндарал шартIру къулай даврил, жанну дуллусса аьралитурал аьпа абад баврил ва цIу миналий – Новосторойрай къатри даврил хIакъиравусса. КIанттул властирдал щаллу къабуллалими масъалартту региондалул структурардайн бутан тIий бур. ЧIярусса арцу аьркин дагьлагьисса, ччяни щаллу бан къашайсса масъалартту хIалли-хIаллих тIий, ятIапирттай щаллу буллан тIий бур.
Хьунабакьаврий гьуртту хьусса райондалул бакIчинал хъиривчу Макьсуд ХIамидовлул бувсунни операциялий гьуртту хъанахъиминнащал ва миннал кулпатирттащал дуллалисса даврия.
Андриана Аьбдуллаева
