Дагъусттаннал халкьуннал шаэр Расул ХIамзатовлул цIанийсса литературалул музейраву хьусса, Лакрал литературалул секциялул ирглийсса батIаврий ххал бивгьунни Аьрасатнал Чичултрал союзравун цIусса члентал кьамул баврил ва цаймигу агьам­сса масъалартту.

Октябрь зуруй дурусну ца шин хъанахъиссар секциялул хъунаману Супиян Оьмаров ивтуну. Ванал бувсунни цува ва даврий зий уния махъ мадарасса лак Аьрасатнал Чичултрал союзравун кьамул бувшиву, хIакьинусса кьини чичултрал аьдад 20-нниха лирчу­сса душиву. «Жу хъинну хIарачат буллай буру жагьилсса чичултгу кIункIу буван, лакку мазрай чичаврил гьунар бусса инсан ухьурча, мунаягу баян бувара тIий буру, буминнащал зийгу буру», – увкунни Супияннул. Шиккува хIукму бунни Читтурдал шяравасса, Ханты-Мансийск шагьрулий яхъанахъисса ХIусайннул арс Кьурбанов Кьурбан Аьрасатнал Чичултрал союзравун кьамул увара тIисса тавакъюращал Союзрал правлениялийн буккан. Гьаз бунни шаэр Булбул Оьмариева «Дагъусттаннал культуралул лайкь хьусса зузала» тIисса цIанин ккаккан бувансса ма­съалагу. Супияннул бувсунни, ноябрь зурул 1-нний Лакрал театрданул залдануву, шаэрнал, Дагъусттаннал иску­сствардал лайкь хьу­сса ишккакку МахIаммадов Илияслул 70 шинал юбилей душиву ва Гьарун Саэдовлун 130 шин шаврин хасну «ккуркки стол» батIинсса пикрилий бушиву Ваччиял шяраваллил активистътуращал уртакьну. Бувсунни ялунчIинсса шинал дувантIисса шаэртурал юбилейрдаягу.
Халкьуннал чичу Мирза Давыдовлул гьаз бунни миллатирттал кказит-журналлайнсса подписка хьхьарану най душиву, оьрчIансса «ЧIавалачин» журналданул тираж шиная шинайн чан хъанай душиву, миллатирттал вакилтал подпискалул чIарав бацIансса чарабакъашиву душиву.