Дагъусттаннал культуралул ва мазурдил байрандалул хьхьичI гьантрай Миллатирттал мазру ва культура ядавриха ва хьхьичIуннай давриха зузисса фондрал президент Аьли Камалов хьунаавкьунни лакрал интеллигенциялул вакилтуращал.
Хьунабакьаврий гьуртту хьунни ва фондрал лакралми вакилталгу. КIицI лавгсса фондрал цалчинсса конференция хьуну дур июнь зурул ахирданий Дагъусттаннал паччахIлугърал университетраву ва фондрал хъунаману увчIуну ур чIярусса шиннардий яруссаннал «ХIакъикъат» кказитрал хъунама редакторну, Миллатирттал кказитирттал редактортурал советрал каялувчину ва Дагъусттаннал Журналистътурал союзрал хъунаману ивкIсса Аьли Камалов.
Ва фондрал учредительталгу республикалий ххуйну кIулсса инсантал бур, миннавух Ссапарбаг Аьбдуллаевгу. Аьли Камаловлул балжину бувсунни фондрал хьхьичI бавцIусса масъаларттая ва дуллан дакIнийсса гьануми давурттая.
Шалласу Шалласуев: «Республикалул миллатирттал дянивгу лакралмур масъала ялунгу захIматссар, гьантлия гьантлийн буттал минарду кьаритлай бушиврийн бувну, кIира райондалий аьмну ацIазарунниха ливчусса инсантал яхъанай бунутIий, миннавугу чIявуми 65-70 шиннардивусса агьлу бунутIий».
Ца ххуттайну бусаннив, ва бур миллатирттал маз ва культура духлаган къаритансса мурад хьхьичI бивхьусса ва му ххуллий дуллансса давурттал аьщуйн щусса лахъисса сияхI дусса фонд. Ва гьарца миллатрал вакилтуращал хьунаакьин дакIний ур даву дюхъан дуваншиврул. Бувсунни Фондрал советравун (президиумравун) гьарца миллатрая ца вакил увчIушиву, аьмну 14 инсан ушиву. Лакралмур вакилну бур Мариян Илиясовал цIанийсса «Дараччи» фондрал президент Гульшан Хасаева. Попечительтурал советрал председательну ур ПаччахIлугърал Думалул депутатну ивкIсса Сафараьлиев ХIажимет.
Ва Советраву гьарца миллатрал хьхьичIунсса арсру ва душру бур, лакрал миллатрая бувчIуну бур: Аьбдуллаев Ссапарбаг, Аьбдуразакьов Сайпуллагь, Абуева Нажават, Баширов Хан, ХIажиев ХIадис, ХIажиев Марат, ХIусайнаева Качар, Каллаев Оьмари, Камалов МухIсин, Муслимова Миясат. БавтIцириннал маслихIатрайн бувну ххи бунни Шалласу Шалласуев ва Оьмаров Супиянгу. Аьли Камаловлул бувсунни Дагъусттаннал сайки гьарца райондалий ва фондрал филиал хIасул буван дакIний бушиву, Дагъусттаннал миллатру миллатруну личIаншиврул, мазру ва культура ядуваншиврул, чара бакъа ччясса мутталий республикалул хIукуматгу, интеллигенция, жяматийсса ишккаккулт, ниттил мазрал учительтал, ниттил маз ва буттал кIану ххирами, культура ядуван аьркиншиву бувчIлачIими цачIун хьуну, ца хьуну зун багьлай бушиву, ялу-ялун ниттил мазрал дарсру школардай чан дуллалаву, мазру бухлагаврицIунсса кабакьаву душиву.
Гьаз бунни муданма цIюрувкьусса масъалартту. Шалласу Шалласуевлул маслихIат бунни, уттива фондрал Попечительтурал советрал цIанияту республикалул бакIчи Сергей Меликовлуйн буккан. «Мазрал хIакъиравусса закон кьамул къадурссаксса, тагьар ххуйчулиннай даххана къахьунтIиссар, Меликовлуйн обращение чичин аьркинни, мунал ХIукуматрайн тапшур буваншиврул мазрал хIакъиравусса закон кьамул дуван ва му проект чара бакъа СМИ-рдай дикIан аьркинссар, агьалинангу хавар бикIаншиврул, мазралсса, культуралулсса буллалисса идарартту багьайкун ми масъаларттаха зуншиврул. Башкорстаннал ва Татарстаннал 17 шинал хьхьичIра кьамул дунни мазрал хIакъиравусса закон.
Республикалул миллатирттал дянивгу лакралмур масъала ялунгу захIматссар, гьантлия гьантлийн буттал минарду кьаритлай бушиврийн бувну, кIира райондалий аьмну ацIазарунниха ливчусса инсантал яхъанай бунутIий, миннавугу чIявуми 65-70 шиннардивусса агьлу бунутIий», – увкунни ванал. Агьамсса ихтилатру хьунни, миллатрал мазрацIун дархIуну душиврия миллатрал культура, тарих ва багьу-бизу, ялун нанисса ник мазурдиягу, жулла аьдатирттая, багьу-бизулия, миллатирттал литература дуккаврия махъаллил хъанай бушиврия ва ми гьарзат дуруччаврил ялувбацIаву хIисаврай цуку-цукунсса давуртту дуллан аьркинну буссарив.
Миллатирттал мазру бухлаган къабитан, аьсрурдай ядурсса халкьуннал культура духлаган къаритан цала хушрай зузисса, республикалул бучIантIимуний аьтIисса инсанталгу, миллатирттал къабигьасса масъаларттаха зузимигу жула дянив бухьувкун, тIайлабацIу баннав дулламуницIун!
