Вай гьантрай МахIачкъалалив халкьуннал шаэр Сулайман Стальскийл цIанийсса, цIу буккан бувсса парк тIитIаврил шадлугърай гьуртту хьунни Дагъусттаннал бакIчи Сергей Меликов, республикалул культуралул министр Зарема Буттаева, МахIачкъалаллал мэр Юсуп Умавов, «Иман» фондрал хъунмур Фируза Каримова ва цаймигу бусравсса инсантал.

Дагъусттаннал Чичултрал союзрал председатель Марина АхIмадова-Колюбакина бакIчину гьуртту хьуна чичултгу. Ва паркрал Яруссаннал ва Къумукьнал театрдал дянивсса шанма сквер цачIун бувну бур, хьхьирил чулийннайсса чарттал чапар цIу дуккан дурну дур, щявсса плитка даххана дурну дур, цIусса мурхьру бувгьуну бур, тамансса давуртту дурну дур. Парк цIу буккан буван харж бивхьуссар сенатор Сулайман Каримовлул.

– Ва парк шаэрнал юбилей дуллалисса шинал цIу буккан бавугу ххуйсса давур. Парк цуппагу, МахIачкъалаллал агьлу бакъагу, районная ва цайми регионная бувкIсса хъамал бучIайсса, батIайсса культуралул кIанур. Дагъусттаннал Чичултрал союзгу, Художниктурал союзгу арх дакъа дур, цаймигу культуралул идарартту гъанну бур, кказитирттал, журналлал редакцияртту, луттирду итабакьай издательстварду. Мяйжаннугусса культуралул кюру хьунува бур. Республикалул бакIчи Сергей Меликовлулгу кIицI лавгуна, парк бусса кIану республикалул агьалинан ччянива ххира хьусса кIану бушиву, утти шагьрулул пляжрайн цIусса ламу бувшиву, мукунма фонтангу цIу дуккан дуршиву, щюллишиврувун бахьлаган бувну бушиву. МахIачкъалалив укун агьали мюнпатну бигьалагансса кIанттурду чIяву хьуннав», – увкуна ва шадлугърай гьуртту хьусса бусравсса лаккучу, Аьрасатнал Чичултрал союзрал член Шалласу Шалласуевлул.

ПатIимат Рамазанова