Октябрь зурул 16-нний МахIачкъалалив, «Россия-Ттул тарихри» тIисса тарихийсса паркраву хьунни Дарбантлив бантIисса РувхIанийсса центрданул презентация. Ваний гьуртту хьунни Дагъусттаннал бакIчи Сергей Меликов, ПаччахIлугърал Думалул депутат Хизри Абакаров, республикалул парламентрал хъунама Заур Аскандаров, Аьрасатнал Виричу НурмахIаммад ХIажимахIаммадовлул нину, МахIачкъалаллал 54 школалул директор Сапижат Мазаева ва цаймигу бусравсса инсантал.

«Ва центрданул тарихраву динну ва культура личIи къадуллай бавкьуну агьали яхъанахъишиву чIалачIи бувантIиссар аьвзал заманнул Дарбантлив бакъагу, щалвагу Аьрасатнаву», – увкуна Сергей Меликовлул. Ванал барчаллагь увкуна укун хъуннасса проект республикалий бартдигьин бакIрайнласу бувсса Сулайман Каримовлухь. КIицI лавгуна ванал меценат хIисаврай гьуртту хьушиву Москавливсса централ мизит бавривугу, МахIачкъалаливсса РувхIанийсса центр бавривугу. Ихтилатру бувна Халкьуннал Мажлисрал председатель Заур Аскандаровлул ва муфтинал хъиривчу МахIаммад МахIаммадовлулгу. РувхIаний центр – «Шанна диндалул паркри». Зувиллий ххюра гектарданийсса, «Южный» тIисса цIусса микрорайондалий бувантIисса. Проектрай буван ккаккан бувну бур мизит, килиса ва синагога. Мизитрал 88 къуппа  бикIантIий бур ва 88 метра лахъишиврул дусса минарарду. Гьаннайсса, Аьрасатнаву яла лахъмур мизит. Музейрду, библиотека, гостиница, конференциярду дай заллу бакъагу, щюллишиврувун бахьлаган бувсса бигьалагай кIанттурдугу. КомплексрачIан гъанну бувантIий бур цIусса автостанциягу, туристътурал автобусирттан личIисса кIану ккаккан бувсса. Проектрай буван ккаккан бувну бур 2000 машина лагайсса аьрщарал лувсса паркинг. Цаймигу къулайшиннардая буслай бур. Ва центр бувантIий бур сенатор, меценат Сулайман Каримовлул кумаграцIух. Бувну къуртал бувантIий бур 2027-ку шинал. Дагъусттаннал парламентрал депутат ХIажимурад Малаевлул кIицI лавгуна «Шанна диндалул парк» Дагъусттаннал миллатирттал дусшиврул уттигу ца лишанну хьунтIишиву.