Совет Союзрал кIийла Виричу АхIмад-Хан Султаннул цIанийсса МахIачкъалаллал аэропортрая октябрьданул 1-нния байбивхьуну «Победа» авиакомпаниялул тIитIлай бур МахIачкъалалия Абу-Дабилийнсса рейсру.
ЦIуну тIиртIусса рейсру дуллантIиссар нюжмардий кIийлла, тталат ва ххуллункьинирдай Boeing 737-800 маркалул самолетирттай.
Билетру машан ласун бюхъайссар аэропортрал кассардая ва авиакомпаниялул сайтрая.
ДакIнин бутанну, МахIачкъалаллал аэропортрай, авиакомпаниярттал тIалавшиннардайн бувну, Аьрасатнал шагьрурдайнсса рейсирдал регистрация дайдихьлахьишиву самолет леххан 2 ссятрал хьхьичI ва къуртал хъанахъишиву леххан 40 минутI лирчIсса чIумал.
Дазул кьатIувсса билаятирттайнсса рейсирдал регистрация дайдихьлахьиссар самолет леххан 3 ссятрал хьхьичI ва къуртал хъанахъишиву леххан ца ссят лирчIсса чIумал.
Регистрация дан чIал хьусса пассажиртал самолетрал рейсрайн кьамул къабуллалиссар.
Му бакъассагу, хIисавравун ласун аьркинссар авиакомпаниярттал тIалавшиннардайн бувсса лагрулул багаж дикIан аьркиншиву. Нажагь, багажрал лагру ккаккан дурссаннуяр ххуттава лирчусса духьурчан, ххишаласса багьа булун аьркинссар.
Багажрал багьрая кIул бан бюхъайссар авиакомпаниялул сайтрая.
Имара Саидова
