Вай гьантрай Казбекуллал райондалийсса Ленинаул тIисса шяраваллил администрациялул хъунама Якьубов Якьуб бакIчисса, чIявусса инсантурая сакин хьусса делегация бувкIунни Украиннал аьрщарай нанисса хасъсса аьралий операциялий гьуртту хъанахъисса Хъусращиял шяравасса МахIаммад Кусаевлул нитти-буттайн, Рафиджаннуйн ва Надирайн, Ккуллал райондалул администрациялийн барчаллагь баян бан.
Делегациялувух бия хасъсса операциялий жан дуллусса Ленинаул шяравасса Манапов Рамазан Раиповичлул уссурвал ТIагьир ва Рамазан. Вайннал бувсунни Запорожский областьрайсса Марьинка тIисса шяраваллия арх бакъа аьралий бигарду бартбигьлагьисса МахIаммадлул хасъсса операциялул ишру къизгъинну нанисса кIанттурдава, цала оьрмулун хъуннасса нигьачIаву душиву бувчIлай буна, архIал талай бивкIсса, аьпалул хьусса аьралитурал жаназартту дуккан дуршиву.
– Ватандалийн кьини дурксса чIумалли адаминал къириятгу, чувшивугу ккаккан дайсса. МахIаммад Кусаевлул дурсса чувшиврун багьа бакъассар. Ванал исват бунни цува Ватандалул хIакьсса патриотгу, ялун нанисса никиран эбратрансса къучагъгу, аьралитурал вихшала дишин лайкьсса дусгу ушиву. Цувагу ивчIан бюхъайшиву бувчIлай буна, цIарал ххурххуппалува уккан унни ванал цала аьралий гьалмахчу. МахIаммадлул дурсса тIул виричувшиврун ккаллиссар. Утти МахIаммад Ленинаул шяраваллил ХIурмат бусса гражданин хъанахъиссар. Барчаллагь хъунмасса нитти-буттан ххаллилсса арс тарбия аврихлу, – тIий бия Хъусращиял шяравун бувкIсса делегация.
Аьпалул хьусса аьраличунал тухумрал, Ленинаул шяраваллил администрациялул, Ленинаул шяраваллил имамнал чулуха Барчаллагь баян буллалисса чагъарду бия МахIаммад Кусаевлуйн ва ванал нитти-буттайн.
ХIакьинусса кьини Рафиджаннул кIия арс – хъуна-хъунама ва чIивима – уссар хасъсса аьралий операциялий Ватандалул мурадру буручлай. ЦIубутIуй чIивима арс Руслан связьрайн къауклай, тамансса хIаллай нину-бутта азурда хьуну бивкIссар. Ахиргу, щаву дирну, госпитальлайн агьну лявкъуссия. Шавай увкIун, азилавгун, ччаннай авцIуну махъ, цIунилгу контракт чирчуну, зана хьуссар цала аьралий гьалмахтурачIан.
Хъунама арснал МахIаммадлул цащалва аьралий бигарду бартбигьлай бивкIсса, кассетный снарядирттал пIякь учин бувсса Казбекуллал райондалиясса Рустам Манаповлул ва Жамалуттин Шамирзаевлул жаназартту личин дурну дур. Аьпалул хьусса аьралий гьалмахтал бигьану къабивкIун бур цIарал ххурххуппалува буккан бан. Ва иш хьуну бур сентябрь зурул байбихьулий. МахIаммадлул аьралий гьалмахтурал нитти-буттахьхьун махъ буллуну бивкIун бур, жанну дуллусса оьрчIру личин бансса. НигьачIаву дусса кIанттурдая гьалмахтурал жаназартту дуккан дан къахъанахъисса захIматсса тагьар хIасул хьуну диркIун дур. Ца ппурттуву МахIаммадлул 500 метралийх ххюрхху увну ур цала гьалмахчу. Частьравун ияннин уцин къавхьуну, усса кIанттай гагу кьаивтун, махъунай увкIун ур. КIилчинмур кьини, квадроциклдануцIун прицепгу дархIуну, лавгун ур цала кьаивтсса кIанттурдава аьралий гьалмахчу уцин. Мунияр хьхьичIгу, МахIаммадлул жан дуллусса Ленинауллаясса цамагу аьраличу уккан увну ивкIун ур. Му бакъассагу, МахIаммадлул ххассал бувну бур щавурду дирсса цикссагу аьралитал.
Цуксса яхI-къирият дусса икIан аьркинни, цала оьрмулун нигьачIаву дуна, махъаллил къавхьуну, аьпалул хьусса гьалмахтал дяъвилул цIарава буккан буллалисса къучагъ. БувчIлай бур, чIавасса оьрмулий хасъсса операциялул ишру ккаккан нясив хьусса оьрчIру хъиннува кьянкьа хьуну бушиву.
Ванал исват бунни иш багьний Ватандалухсса ччаву оьрмулияр ялтту дуккайшиву. Укунсса патриотътал буссаксса ххувшаву ласуншиврийнсса вихшала хъиннура цIакь хъанай дур.
Ватандалул мурадру буручлачисса цинявппагу аьралитал цIуллуну-сагъну зана хьуннав ссавур дакъа цахва ялугьлагьисса ичIувациринначIан.
Имара Саидова
