«Хасъсса аьралий операциялий гьуртту хъанахъисса хIа­писартурал, офицертурал ва хушрай Ватандалул мурадру бартбигьин лавгсса вирттаврал, чIярусса шиннардий оьбалартту бухIлай бивкIсса Донбассуллал агьали неонацизмалия мурахас буллай, ларайсса даражалийсса къучагъшивуртту ккаккан дур­ссар», – тIий цимилгу цала ихтилатирттаву кIицI лавгунни Аьра­сатнал Президент Владимир Путиннул. Хасъсса операция нани­сса хIаллай Президентнал увкусса махъру бунияласса бушиву исват бувссар жула аьралитурал.

Украиннал аьрщарай аьралий операция байбивхьуния шинмай цивппа рязину Ватандалул мурадру буруччин хIадурну бушиву ккаккан бувссар цикссагу жагьилтурал. Ватандалийн кьини дурксса чIумал хъиннува бувчIлай бур жула жагьилтал кунма къучагъсса ва чумартсса цайми бакъашиву.
Ва ххуллухь на бусан ччай бура СВО-лий гьуртту хъана­хъисса ЦIуссалакрал райондалийсса Гьамиящиял шярава­сса Мирзахан Аьлиевлуя. Ванал, цува хушрай лавгун, чирчуссар СВО-лий гьуртту хьунсса контракт.
Мирзаханнул ва чIявусса цаймигу жула жагьилтурал, хасъсса операциялий къучагъну талай, ккаккан бувссар цивппа Ватандалийн дакI тIайласса аьра­литал бушиву. Аьралий операциялий гьуртту хъанахъиссаксса хIаллай ванал тасттикь бунни цува кьянкьасса низам дусса, тапшур бувсса амру биттур бан хIадурсса, унгу-унгусса хIаписар ушиву.
Мирзахан ур жула аьрщарайсса паракьатшиву дуруччаврил цIаний нигь-ццах бакъа талатисса къучагътуравасса, жагьилсса никиран эбратрансса Виричу!
Аьралий бигарду къучагъну бартбигьаврихлу вай гьантрай Мирзахан Аьлиевлун дуллунни паччахIлугърал ларайсса награда – Суворовлул медаль.
Лажин хIадур дурссар
Имара Саидовал