Вай гьантрай республикалий, щалагу билаятрай кунна, лахъа-хъунсса даражалий кIицI ларгунни Учительнал пишалул байран. БайрандалуцIун бавхIуну цала коллектив барча бунни МахIачкъала шагьрулул 49-мур школалул директор, ххаллилсса педагог ва каялувчи, Ризауттиннул арс Аьвдулкарин Айгуновлул.

Ванал каялувшиву дуллалисса педагогтурал коллективрал Учительнал кьини кIицI ларгунни Р. ХIамзатовлул цIанийсса Национал библиотекалуву.
КIицI къабувну битан къахьунссар, ванал каялувшиву дуллалисса 49-мур школа республикалул хьхьичIунсса школарттал сияхIрай бушиву. Школа укунсса даражалийн биян бан хъунмасса бияла директорнахь буссар.

Бусса оьрму оьрчIан тарбия ва кIулшивуртту дулаврин хас бувсса учительтал пишалул байранналущал барча бан бувкIун бия хIурмат лавайсса хъамал. Миннавух бия ДР-лул захIматрал министрнал хъиривчу Зураб БахIаммадов, республикалул жаваблувсса къуллугъирттай зий ивкIсса, лакрал миллатраву хIурмат-кьиматрайсса ХIажибутта ХIусайнов, МахIач­къала шагьрулул Имамтурал советрал председатель Аьбдулла Ахалов, МахIачкъалаллал клиникалул азарханалул хъунама хIакин АхIмад Кьурбанов ва цаймигу.

– Учительнал пиша караматсса пиша бур. Учительнал бивзсса гьану, дуллусса кIулшивуртту инсаннан гьарица бивзсса шаттираву дучIи ляхълай дур. Буккин, чичин къакIулну бувкIсса оьрчIан учительнал тIитIлай ур кIулшивурттачIансса ххуллу. Учитель дакI цIий ва аякьалий уссар цачIава дуклай бивкIсса оьрчIай вай школалия лавгун махъгу, мудан ххари хъанай уссар оьрчIал ххувшавурттая, тIайлабацIурттая, къумалаглай уссар миннал байча щурча, миннал оьрмулуву тIааьндакъашиву хьурча. ХIакьсса учитель ур дакIгу, кьюкIгу оьрчIаву дирхьусса инсан.

– Ххирасса учительтал! ДакIнийх­туну барча дуллай ура зул пишалул байран. ЧIа тIий ура зун цIуллушиву, гьарица давриву тIайлабацIу, талихI-тирххандарайсса оьрму. Къалещаннав зуву даврихсса гъира-гьавас! – увкунни цала коллективрахь Аьвдулкарин Ризауттиновичлул.
Учительтал барча буллай, цала ихтилатраву ХIажибутта ХIу­сайновлул кIицI лавгунни, учительтал мудангу эбратну хъанахъишиву ва минная хъар хъанахъишиву оьрчIал бучIантIимур. КIулшивуртту дулаврил ххуллий захIмат бихьлахьисса пишакартал барча буллалисса ихтилатру бунни хIурмат лавайсса хъамаллуралгу.
Аьвдулкарин Айгуновлул хьхьичIунну зузисса учительтуран дуллунни ХIурматрал грамотартту ва тIутIал кацIру.

Имара Саидова