Ларгсса нюжмаркьини, октябрьданул 4-нний, Редукторный посёлокрай цIуну буллалисса Ися Идавсил (аь. с.) цIанийсса рувхIаний центрданийн, МухIаммад Идавсил (с.аь.в.) мизитравун, лакрал мажлис-мавлудрайн бавтIун бия шаназарунниха ливчусса лак.

БавтIун бия Аллагьнал гьан увсса махъа-махъма Идавс (с.аь.в.) увсса ххаришиву кIицI лаган, жувагу Мунал ккаккан бувсса ххуллийх най бушиву чIалачIи бан. Мажлис байбишиннин бавтIцири бия исвагьину чIюлу бувну хIадур бувсса кIанай хъамакъабитулунсса суратру ришлай, мизитравух экскурсия буллай. ЧIявуя Мариян Илиясовал цIанийсса «Дараччи» фондрал экспозициялий тамаша буллалимигу. Ва давугу дурну дия Республикалул Халкьуннал творчествалул къатлул директорнал хъиривчу Гульнара Мюрщиевал, хьхьичIазаманнул тIахIни-кIичIу, муму-тамур, цуппа заллусса коллекция ккаккиялун бивхьуну.

Мажлис байбивхьуна караматсса чIунил ва такьвалул заллу, Стамбуллай дуркку­сса, Ххутрал шяравасса хIапиз МухIаммад-Наби Буттаевлул Кьурандалул аятру дуккаврийну.
Дагъусттаннал муфтинал цIанияту агьали барча буллай, муфтинал хъиривчу, исламрал элмурдал доктор МухIаммад МахIаммадовлул (Кахибскийл) кIицI лавгуна республикалий, нахIушиву, дакьаву дуруччавриву бикIу, рувхIаний культура хьхьичIуннай дувавриву бикIу, муфтиятрал хъунмасса бияла бушиву ва му давриву хасну лакралмур бутIагу хъунмасса бушиву.

Вава мяъна-мурадрайсса бия Дагъусттаннал просвещениялул отделданул каялувчи Идрис Асадуллаевлул ихтилатгу.
Исламгу, ниттил мазгу хьхьи­чIунну бикIан аьркиншиврия, буттал кIанттух ччаву дуну яхъанан аьркиншиврия бия Ккуллал райондалул имамтурал советрал председатель МухIаммад-Маннар Бариевлул, Чараваллал шяраваллил имам Камил Маммаевлул ихтилатру. Дагъусттаннал экономикалул ва территориал развитиялул министр ХIажи Султановлул бувсунни цанма асар хьушиву, Лаккуй ислам машгьур дуллай зузисса, табасараннал миллатрал вакил, Шихмурад ХIажимурадовлул марцIну лакку мазрай ихтилат бувавугу, лакку мазрайсса мавлуд дуккавугу. Ислам лахьхьавриву, исламрал ххуллий оьрму бутавриву барачатшиву лякъинтIишиврия, агьалинан ялу-ялун диндалул агьамшиву дурчIлай душиврия, жагьилтурангу, дуклаки оьрчIангу тIайласса ххуллу цумурдив бувчIин буллан аьркиншиврия бия Кьиблалул территориал округрал просвещениялул отделданул каялувчи МухIаммад Майрановлул ихтилат.

Исламрал кIулшивуртту ласласисса мюталинтурал бувсуна цала дуккаврия. Ши­ккува кIицI лаганна, исламрал кIулшивуртту ласун ччинан хIадур дурну дия ххуйсса видеосурат. Мукунна ххуйсса видеосурат дия Дагъус­ттаннал муфтинал, щайх АхIмад-хIажинал оьрмулул лахIзардая бусласисса. Дия лакрал бюх­ттулсса тарихраясса видеосуратгу.

Авадансса программа ягин дурна айфоннал ва чIивимур хIажлийнсса путевкардал (шанна айфон ва вайкссара путевкарду) заллухъру хьунсса тIайлабацIу хьуминнал ххаришиврул. Оьмралийнсса кIира путевка кIунурду къабувккунува дуллуна арилчинмур курсирайн бияннин дурккусса мюталинтуран. Вайннахьхьун путевкардал сертификатру дуллуна ЦIуссалакрал (ЦIумина) райондалул имам Мансур Хаваевлул.

Дия ххуйсса гьанттайнссаннул урцIи. Шикку кIицI къалавгун битан къахьунссар, лахъсса даражалий мавлуд тIайла дукканшиврул, хъунмасса захIмат бивхьушиву Сакиншиннарал комитетрал члентурал, хаснува лакрал имамтурал, волонтёртурал, дукралуха зий бивкIминнал. Шаназара инсаннансса урцIилул даву сантирай ва низамрай дуван къабигьассар, амма лакралмур мавлудраха зузиминнал ва даву цIа данну дунни, мавлуд къуртал хьуну махъгу гьарзат ларкьуну, пар-партIи дурну. Гьаннайсса, мавлудрайн бувкIцириннал итталун къадагьсса давурттугу, къайгъурдугу мудангу чIявуссар.
Умудрай буру, жулва авадансса тарих бусса миллатрал цашиву ккаккан дурсса, лакрал куннал куннахсса ччаву хъиннура цIакь дувансса мажлисрал барачат щалвагу миллатрайн биянтIишиврийн.
Ахирданий, аьдатрайн бувну, мавлудрай гьуртту хьуминнал цаппара пикрирду:

Шихмурад ХIажима­хIамма­дов, Лакрал райондалийсса «Инсан» фондрал каялувчи:
-– Декабрьданул 29-нний 28 шин хьунтIиссар ттул Лаккуй зий, лавхьхьунни лакку мазгу, лакрал багьу-бизугу. 18 шинай зий ивкIра Кьубав имамну, 4 шинай – Лакрал райондалул имамну, шинни «Инсан» фондрал Лакрал райондалийсса вакилну. АлхIамдулиллагь щукру, шиная шинайн тIиссакссагу, лакрал миллатраву исламравун кIункIу тIутIими чIяву хъанай бур, тагьар ххуй чулиннай да­ххана хъанай дур, мажлис тIайла буккаврил давугу ххуй хъанай дур. ХIалу дагьну дунура, барчаллагь учин ччай ура ва мавлудрал даву ххуйгу, хъунгу дуван хIарачатрай бивкIцириннахь, хаснува лакрал ссурваврахь. Агьали МухIаммад Идавсихсса (с.аь.в.) ччаврил гъан буллай бушиврия дакI ххари хъанай дур. Инсантурал чанна лархъсса, ххарисса симанну чIалай ттулмур дакIгу ххари хъанай дия.

Саэд Кьурбанов, пенсионер:
– Ххари хьунна чIявусса лак бавтIун ккаккаврия. Бигьалагай кьини дакъанура чIявусса бия. На ттулва кулпат Чимназлущал увкIссияв, вагу рязину ливчIунни. Лакрал буниялттунгу ккаккан дунни жула цашиву, цачIушиву, дусшиву, буттал аьрщи, лакку маз ххирашиву, МухIаммад Идавсих (с.аь.в.) куртIсса ччаву дусса уммат бушиву, исламрал диндалул хIурмат бушиву. Ттун ххуй бивзунни жагьилсса имамтал лакку мазрай гъалгъа буллай бушиву. Вагу махъа наниминнан иширайнусса эбрат ккаккан давур. Ва ялагу, жулва лавгцириннал рухIирдан мюнпатсса хьуннав тIий, кьулгьу-кьуран буккарду, уттаваминнан цIуллушиву, дунияллий дакьаву чIа тIутIисса дуаьртту дуварду, ххуйсса нашидирттах вичIи дишарду.

Сапижат Мазаева, Аьрасат­нал Виричу НурмахIаммад ХIажимахIаммадовлул нину:
– Кьамулсса мавлуд хьуннав. Хъунмасса барчаллагь лакрал аслансса чиваркIуннангу, уздансса ссурваврангу. Лакрал миллатрайн барачат ликкаврил лишанну хьуннав, лакрал вирттал гьарза баннав, иман цIакь хьуннав, Аллагьнал ххуллийх бачин­сса тавпикь дулуннав щалвагу лакрал жяматрахьхьун. Дурцири дуаьрттугу, бувцири садакьарттугу, Аллагьнахлу буллалимургу кьамулсса хьуннав!

Оксана Чугуева, радиолул ва телевидениялул журналист:
– Хъинну ххуйсса баннерду дия. Ящунал ябацIансса. Лакрал бюхттулсса тарихрая кутIану, амма куртIну бусласисса. Мавлуд цурдагу ххуйсса даражалий ларгунни, чIаважагьилтал, школ оьрмулувусса душру волонтёртуравух, дука-хIачIанмур ххилай, хъар лахълай бия. ЧIявусса бия мюрщи оьрчIругу. Архсса кIанттурдая бувкIссагу бия. Чачаннава бувкIсса лакгума бия. Гьавангу, бучIавангу цIуллушиву дулуннав цинявннахьхьун, ялунчIингу вава даражалий, ванияргума ххуйсса даражалий мажлисру буллан.

Саният ХIажиева, Чувшиврул орденналул кавалер Асхад ХIажиевлул нину:
– Ттул ва цIуну буллалисса мизитравун биянсса мурад бу­ссия ччянива, суратирттай, видеорттай бакъасса, цуппа мизит къаккавкссия. Утти, лакрал мавлуд савав хьуну, ва мизит кка­ккансса сантгу дагьунни. Хъинну хъуннасса даву дурнугу дур, дуллайгу бур. Ва кутак, ва стройка, ва хIарачат. ДакI даркьунни мавлудрай лакрал тарихрая бусласисса видеосуратрай. Ттул ппу Кабардиннаву увсса, тийхва хъуна хьусса лаккучу ур, нину кабардиннал миллатрал инсан бия, ласгу – лаккучув. Шинну наниссаксса лакрал миллатрал тарих лахьлан ччан бикIайсса бур. Лак, Дагъусттаннай цалчин бусурман дин кьамул дарчагу, цалчин кьариртмигур тIун бикIай, цIуницIагу, дин хIисавравун ларсун, лакрайгу аргъ дирзун душиву аьлтта чIалай бур. Я раппий, я Аллагь, ва мавлуд барачатсса хьуннав, дяъвилул цIу лещаннав, аьрайцири шаппай цIуллуну-сагъну зана хьуннав!

Ци ххи бави? Мавлудрай мадарасса бия СВО-лий ливтIусса Вирттаврал нитти­хъул. Аьпа баннав жулва лавгцири Вирттаврал. Я Аллагь, ссавур дулуннав вай циняв ххаллил­сса, яхIлувсса ниттихъахьхьун, гихунмаймур оьрму цIуллуну-сагъну, арсру Алжаннул багъирдаву цачIун хьуну бушиврийн вихну, бутлан…

ПатIимат Рамазанова

Суратру Арсланаьли
Сулаймановлул