Дагъусттаннал халкьуннал Цашиврул кьини, чIявуми отпускирдай миву-тиву буну, цила чIумал къадурну, утти, сентябрьданул 28-нний, дунни Саха Республикалий (Якутия) Мирный шагьрулий – алмазирттал хъун-шагьрулий. Ванил сиптачитал ва сакиншинначитал бия Дагъусттаннал миллатрал-культуралул «Имамат» сакиншиндарал активистътал. Ва сакиншиндарал председательнугу ур жула лаккучув, Карашрал шяравасса Зураб ХIусайнов.

БавтIминнал хьхьичI ихтилатру бувна Мирнинский райондалул бакIчинал буржру биттур буллалисса Георгий Башариннул, шагьрулул бакIчинал цалчинма хъиривчув Алексей Цырендоржиевлул, Халкьуннал Мирнинский Ассамблеялул вакилтурал. Ва Ассамблеялул председательнал хъиривчув Иван Игнатьевлул «Имамат» сакиншиндарал хьхьичIунсса члентуран буллунни Барчаллагьрал чагъарду.
Шадлугърай гьуртту хьунни ва улклуйсса цинявппагу диаспорарду: Армяниналсса, Азирбижанналсса, ТаджикIналсса, Къиргъизналсса, Молдавияналсса, Белоруссияналсса ва цаймигу, цинявппагу 10 диаспоралулсса.
Гихуннай жулла республикалул халкьуннал балайрду ва къавтIавуртту дусса, багьу-бизу, канил пишарду, дуки-хIачIияртту ккаккан дуллалисса хъуннасса концертрал программа хьунни.

Дагъусттаннал халкьуннал Цашиврул кьинилул байран хьунни «Создание условий для развития межнациональных и межконфессиональных отношений на 2024-2028 гг.» тIисса цIанилусса муниципал программа щаллу даврил лагрулий.
«Имамат» сакиншиндарал активрал барчаллагь увкунни Мирнинский технический колледжрал каялувшиндарахь, райондалул Культуралул управлениялухь ва Халкьуннал ассамблеялул Мирный шагьрулийсса отделениялухь ва байран давриву бувсса кумаграхлу.

Бадрижамал Аьлиева