ЧIун анаварну най дур. Сергей Меликов Дагъусттаннал каялувчи уттигъанну хьусса ххай ура. Амма мукьра шин ларгун дур.
Цукунсса диркIссар ми шинну? Гьа-гьай, ца ххуттаву миннуя бусан къашайссар.
Амма хIисаврайн къаласунгу къахьунссар, Меликовлул командалул ххуллу лавсун бивкIшиву хъуни-хъунисса масъалартту чулийн буккан баврил ххуллу язи бувгьун бушиву. Бусанну так цуксса дахханашиву хьуссарив дуккавриву.
ДакIнин бутанну, так ца гьашину республикалий тIивтIуну бушиву 21 школа ва 10 оьрчIал багъ. Шинал ахирданийнин пландалий бур лицензияртту дулун уттигу 9 школалун ва 4 оьрчIал багъран. Ларгсса шинал цIу буккан буван харж дурну дур 3,6 млрд къуруш. ГьануцIакул бакьин бувну бур 139 школа, цIуну тIивтIуну бур 15 школа ва 13 оьрчIал багъ. Махъсса цаппара шиннардий бакьин бувну бивкIссар ттинин 30 шинал мутталий бакьин къабувну бивкIссаксса школартту.
Утти бусанну так махъсса кIива зуруй дурсса давурттая. Дарбантуллал райондалий тIивтIуссар Дагъусттаннал ва Азирбижаннал цачIусса предприятие «S R Plast». Федерал ххуллул чIарав бувссар цIусса транспортрал ва логистикалул агроцентр.
Табасараннал райондалий Хучниннал шяраву дурссар мероприятие «Дагъусттаннал кулпат». Муния махъ укуннасса мероприятие хьуссар Ххунзахъиял райондалийгу, 19 зунттал районгу гьурттуну.
Росатомрал ихтияр ларсун дур Дагъусттаннай Аьрасатнаву яла хъунмур мурчайэлектростанция (ВЭС) буван. Дагъусттаннал ва компаниялущалсса рязишиврий къулбас дурссар 5 шинал мутталий ветроэнергетика лядуккан даврил бутIуву хIала-гьурттуну зун. Ва ялагу, «Новая энергия» ООО-лул ларсун дур Дарбантуллал СЭС буван. Дагъусттаннал ХIукуматрал компаниялун личIи дурну дур 305 гектар аьрщарал.
Аьрасатнал ХIукуматрал Председательнал хъиривчу Александр Новаклул ва Сергей Меликовлул ххал бивгьуссар Дагъусттаннай 2036 шинайннинсса мутталий энергосистема лядуккан даврил программа хIадур даврил масъалартту.
Аьрасатнал Строительствалул ва ЖКХ-лул министр Ирек Файзуллиннул ва Сергей Меликовлул ххал бивгьуссар Дагъусттаннал строительствалул ишру лябуккан баврил масъалартту.
Сергей Меликовлул ва «Системный оператор Единой энергетической системы» АО-лул правлениялул председатель Федор Опадчил ххал бивгьуссар республикалул энергетикалул отраслилул тагьар ва салкьи хьусса захIматшивуртту духлаган дувансса ххуллурду.
Республикалий хьунни дунияллул халкьуннал дянивсса бандитътурал кьюкьри ххит дуккан дурну 25 шин шаврин хас дурсса хъунисса мероприятияртту.
Сулайман Стальскаллал райондалий тIивтIунни СКФО-рай ца хъунмур завод «Эксонор», микку турбарду буллантIий бур.
Вайннуяр ххишала, республикалий хьунни цаймигу хъунисса мероприятияртту. Ми цинявннуя кказитрал лагрулий бусан къахьунссар.
Ми циняв иширттаву хъунмасса захIмат бивхьуссар республикалул каялувчинал. Гьай-гьай, республикалул циняв масъалартту цакуну дузал буван къашайссар. Мунияту жунна аьркинни ссавур дуван ва хьул бишин ми циняв масъалартту дузал бантIишиврийн.
ХI. Аьдилов
