Ккурккуллал шяраваллийн ччяния шихунмайва аьлимтурал шяравалу учай. Мяйжаннугу чIирисса шярава бувккун бур 60-ннийн бивсса личIи-личIисса элмурдал кандидатътал, 8 элмурдал доктор. КкурккуллачIа мудангу дур дуккаврил сий.
Нажагьсса бикIай жул оьрчIаву школа къуртал бувну махъ дуклан къабувхсса. Аьрасатнал личIи-личIисса шагьрурдайсса цивппа дуклакисса вузирдаву ва колледжирттавугу вай хьхьичIунсса студентътуран ккаллину бикIай. Гьашинусса шингу Ккурккуллал шяравасса выпускниктуран тIайлабацIусса дия учин бучIир.
Исял душ ПатIима Исяева бувххунни М.В. Ломоносовлул цIанийсса Москавуллал паччахIлугърал университетрал механикалул ва математикалул факультетрайн. МахIачкъалаллал 28-мур гимназиялий лавайсса кьиматирттай 9 классгу бувккуну, ПатIима бувххунни Москавуллал Бауманнул цIанийсса инженерный лицейравун (№1580). Математикалуву ляличIину итххявхсса ученица хIисаврай лайкь хьуну бур медальданун ва ХIурматрал грамоталун. Ва бур «Росатом» ва «Будущее науки» тIисса олимпиадарттал призер.
Кьурбаннул душ Мариян Гъужиевал ва Айдамирдул оьрчI Шарипхан Магьдиевлул лавайсса кьиматирттай къуртал бунни Ккурккуллал школа. Мариян бувххунни Санкт-Петербургуллал медико-социальный институтрал лечебный факультетрайн, Шарипхан – Дагъусттаннал паччахIлугърал техникалул университетрал навтлил ва газрал факультетрайн. Вайннал чялишсса гьурттушинна дайссия школалий дуллалисса цинярдагу мероприятиярттай. Райондалул дуклаки оьрчIал дянивсса спортрал бяст-ччаллаву, шеърирду пасихIну буккаврил конкурсрай гьуртту хьуну, хьхьичIунсса кIанттурду бугьайссия.
Маратлул душ Самира Аьбдуллаевал ххуйсса ккаккиярттащал къуртал бунни МахIачкъалаллал 29-мур школа. Дуккавриву хIарачат бусса, ххуйсса тарбия ларсъсса Самира ххирасса бия учительтуран ва архIал дуклакиминнан. Ва бувххунни Дагъусттаннал медициналул университетрал лечебный факультетрайн.
Барчагу буллай, чIа тIий бура жула жагьилтуран дуккавриву хьхьичIуннайшивуртту ва тIайлабацIурду.
Хьуннав зуяту школалулгу, шяраваллилгу цIа бюхттул дансса ххаллилсса пишакартал.
Андриана Аьбдуллаева
