Илияс Къаяевлущалсса ихтилат
«Чичрулийнусса Дагъусттаннал памятникру» тIисса сериялий уттигъанну бувккунни дунияллийн аьраб мазрал гьанулийсса материаллайну сакин бувсса элмийсса лу. Ва итабавкьуну бур «Дагъусттаннал бусурманнал ва Волга-Ураллал региондалул дянивсса элмийсса ва динийсса дахIавуртту» тIисса цIанилу. Ванил авторталну бур Шамил Шихаьлиев ва Илияс Къаяев.
Жулгу, Илияс Къаяевлулгу дянив хьунни ва монографиялул хIакъиравусса чIиви-хъунсса ихтилат.
– Илияс, инагу, машгьурсса аьрабист Шамил Шихаьлиевлулгу цачIуну итабавкьусса элмийсса луттирах къулагъас къадансса хъинну чансса бакъа къалякъинссар. ЧIалай бур мунил агьамшиву чIирисса дакъашиву. Цукун, ци ххуллий дакIнин багьуна зун му аралул масъалартту ххал бигьин, учиннуча, элмулул ххалуйх лаххан?
– Учин мукъун, 1552-кусса шинал, Къазаннал ханлугъ лиян дурну мукьах, татарнал цаппара аьлимтал цалла кIулшиву ласлай бивкIссар Дагъусттаннал мадрасарттаву, яни мунийну ядуллай, дуручлай бивкIссар Волга-Ураллал региондалийсса ислам диндалул элмийсса традиция. Хъиривсса чIумул мутталий тIурча, занабитулул ххуллийсса кунмасса процесс, яни, Дагъусттан Аьрасатнал империялувух хIала бавкьуну махъ, жула кIанттул аьлимтал кIункIу хьуну бур Волга-Ураллал региондалул интеллектуал биялалул лагрулувун. ВаницIунма бавхIуну, жул пикрилий, кIицI лаган багьлай бур супийтурал аралулмур къяртригу, цивгу асар хьунну хIала дурххун диркIсса, жура кIицI лаглагисса кIирагу региондалул дянив дакъассагу, Аьрасатнал империялул дазурдал кьатIувгу. Волга-Ураллал кIанттурдай яхъанахъисса Дагъусттаннал цаппара щайхтурал тапшур дайсса диркIун дур татарнал ва башкирнал щайхтурайн насихIатчишиву дансса ихтияр (иджаза). Тайннал тIурча, цала ххуллий диялсса дахIавуртту диркIссар Дянив Азиянал, ХIусман империялул ва Гъанмур Машрикьуллал супийтурал сакиншиннардащал. Мукьахуннай тIурча, мира супийтурал къяртри гьарза-гьартану ппив хъанай диркIссар Дагъусттаннайгу.
Жул монографиялул хъунмур мурад хъар хьуну буссар Сайпуллагь-кьади Башларовлул цачIун дурну чирчуну диркIсса материалданийн, мунал му чирчуну диркIун дур Троицк шагьрулий, цува тикку щайх Зайнуллагь РасуловлучIа дуклай ивкIсса чIумал. Яла махъ му канихчичру дуллуну диркIун дур Аьли Къаяевлухьхьун. Му жун, яни А. Къаяевлул фондрал уртакьтуран, ляркъуна аьлимчунал архив ххал бигьлагьисса чIумал.
Жу дурсса хъиривлаявурттал лагрулий хIарачат бувну буссар чIалачIи бан Волга-Ураллал региондалул ва Дагъусттаннал динийсса дахIавурттал аьмсса контекст, аьлтту дурну дуссар личIи-личIисса кIанттурдайсса супийтурал сакиншивуртту. Мукунма жул захIматраву ккаккан бувну буссар татарнал ва башкирнал супийтурал-щайхтурал иджазартту.
– Ттун кIулссаксса, зул луттирал гьанулул хъусну ишла дурну дур Сайпуллагь-кьади Башларовлул канихчичру. Му зуйн цукун тIайла дарцIур?
– ТIайлассар, жул монографиялул хъунмур мурад хъар хьуну буссар Сайпуллагь-кьади Башларовлул цачIун дурну чирчуну диркIсса материалданийн, мунал му чирчуну диркIун дур Троицк шагьрулий, цува тикку щайх Зайнуллагь РасуловлучIа дуклай ивкIсса чIумал. Яла махъ му канихчичру дуллуну диркIун дур Аьли Къаяевлухьхьун. Му жун, яни А. Къаяевлул фондрал уртакьтуран, ляркъуна аьлимчунал архив ххал бигьлагьисса чIумал. Фонд сакин баврил ва му чялишну зузи баврил ца яла хьхьичIунма сававчину ивкIсса Амучи Амуттиновлул маслихIат бувна кIицI дурсса канихчичру дунияллийн дуккан дан цуппалусса жужрай, элмийсса комментариярттугу хIадур бувну.
Шиккува ца-кIива махъ учин ччива, чIун дакъана аьпалухьхьун лавгсса, Михаиллул арс Амучи Амуттиновлуя. Ва ия чIяву-чIявусса иширттал мухIлу-хIин кIулсса, чантI увкусса инсан, интеллектуал. Ванал хъинну усттарну Фондрал лагма лаган бувна зат кIулсса инсантал, профессионалсса тарихчитал, филологтал. БакIрайн ларсъсса даву, ци журалул, ци жапашиврул духьурчагу, ванал чара бакъа чулийн дуккан дайва. Инсанталгу ванацIун кIункIу шайва гъирарай. Ва луттирал ххуллийсса жула захIматгу жу хас барду Михаиллул арс Амучи Амуттиновлул аьпалун. Амучил асар хьунсса кабакьаврицIух Аь. Къаяевлул цIанийсса фондрал дунияллийн буккан бувссар Дагъусттаннал тарихрал ва культуралул язи-язисса чуллу аьч буллалисса кьунияхъайсса элмийсса захIматру, луттирду.
– Лакку буккул хъиннура ххишаласса къулагъас дансса бутIану бур аьлимчу ва шаэр Ккурккуллал Зайдул биография. Ци чин бюхъанссар мунил хIакъираву?
– Му аьлимчунан цанмагу, мунал дурмунингу багьайсса кьимат ттинин бивщуну бусса ххай бакъару. Му кIантту цахъис бухьурчагу тIайла бацIан бансса ишну хьуну бухьуви тIий буру жула монографиялуву мунал биографиялухьхьун буллусса кIантту. Шикку жу ишла дарду Ккурккуллал Зайдуясса Аьли Къаяевлул материаллугу, татарнал аьлимчу Риза Пахруттиннул Зайдуясса бусавурттугу. Жуща бювхъунни мяйжан бан Ккурккуллал Зайду увччусса кIанттугума. Риза Пахруттиннул материаллаву жун ляркъунни укунсса чичру: «Зейд Курклинский за участие в восстании 1877 года был сослан в Томскую губернию и умер в русской деревне Спас Каинского уезда Томской губернии в месяце раби ал-аввал 1297/ в феврале 1880 года. Похоронен на мусульманском кладбище деревни Чуртанды, что в 16 верстах оттуда».
Жу, фондрал уртакьтал, дакIнийну буру, та хIатталлийнгу бивну, жула лакрал цIанихсса арс увччусса кIанттугу лявкъуну, тикку кIалабарзгу бацIан бан. Мукунна жул кьаст дур Псковскаллал областьрайсса Опочка тIисса шагьрулул хIатталлий Гъази-Гъумучиял округраясса ва ТIилиратIиял шяравасса ссивирлувтал бувччусса кIанттай дацIан дан аьпалул гьайкал. Та хIатталлий бувччуну буссар 800-нная ливчусса жула зунттал инсантал. Му зат щаллу баву жуйвасса буржри.
– Зул монографиялуву гьарза-гьартану бувсун бур Сайпуллагь-кьади Башларовлул библиотекалия ва мунал творчествалия. Ца-кIива махъ мунил хIакъиравугу.
– Мяйжаннугу, жул луттираву буссар щайх Сайпуллагь-кьади Башларовлун ва мунал канила дуркмунин хас бувсса биялсса бутIа. Жуща аьщуйн щуну кIул бан бювхъунни 1877-ку шинал хьуну диркIсса восстаниялувух Сайпуллагь-кьади гьуртту хьуну къаивкIшиву. Му кIантту тасттикь буллай бур цумарив ца Сяид-апанни тIисса инсаннайн Сайпуллагь-кьадинал чивчуну бивкIсса чагъарданул. Микку Сайпуллагь-кьади чичлай ур бувгьуну гьан бувсса арестантътурал хъус-кьинилул сияхIрая, паччахIнал администрациялул кIицI лаглагисса куццуй, чичлай ур оьруснал ва туркнал дянивсса дяъвилийн (1877-1978 шин) Аьрасатнал чулий цала хушрай талан нанисса арамтурая. Му ппурттуву цува Сайпуллагь-кьадигу ивкIун ур Гъази-Гъумук. Му мяйжан буллай бур чагъарданул ахирданийсса укунсса чичрулул: «От вашего слуги Сейфуллаха б. Ницубакри 25 джумада II 1295 г. (28 мая 1878). И я, упомянутый Сейфуллах-кади, нахожусь в Кумухе в доме покойного Хаджи-Атта».
Ихтилат бувссар
Руслан Башаевлул
