Вай гьантрай цилла оьрчIшиву ва чIаражагьилшиву ларгсса Дагъусттаннайн, Дарбантлив, бувкIун бия Аьрасатнал Федерациялул лайкь хьусса артистка, уттирив Дагъусттан Республикалул халкьуннал артисткагу хьусса, Жасмин (Шор Сара Львовна). Ванищалсса хьунабакьаву хьуна Дагъусттан Республикалул Культуралул министерствалий ва МахIачкъала шагьрулул П.И. Чайковскийл цIанийсса ОьрчIал искусствардал 1-мур школалий.
Культуралул министерствалийсса хьунабакьаврий ва кьини ихтилатру хьуна цIа дурксса балайчинал ппу Манахимов Лев Яковлевичлуя. Хххаллилсса балетмейстер, педагог, Дагъусттаннал искусствардал лайкь хьусса ишккакку Лев Яковлевичлул цимигу ник тарбия дурну дур. Ванаясса аьпалун Дарбантлив «Жасмин» цIанилу тIивтIуну бур ОьрчIал творчествалул клуб. Шикку ялун личин буллай ва магьир буллай бур оьрчIавусса личIи-личIисса пагьмурду: къавтIун бизаврил, балай учаврил, сурат дишаврил, чил билаятирттал мазру лахьхьаврил, заргалшиву даврил ва м.ц. Хьунабакьаврий ихтилатру хьуна Жасминнул ниттиягу – Маргарита Семеновная, ххаллилсса дирижерная.
Ниттиясса аьпалун Жасминнул цилва душнин дирзун дур Маргарита тIисса цIа. ЦIана чIава Маргаритагу най бур цила ниттил, ниттил ниттил ва ттаттал шаттирдайх, ва дуклай бур Гнесинкалуву, фортепиано бишлай. Бур ниттил кунма балай учаврил гьунаргу. Цахъис хьхьичIун буклай учин, Жасминнул хъиривмур кьини Дарбантлив ккаккан дурсса концертрай Маргариталгу увкуна балайрду: ниттищалгу, цилвалугу.
Республикалул культуралул министр Зарема Буттаевал хъамалудушнихь бувсуна МахIачкъалаллал Г. ХIасановлул цIанийсса музыкалул училищалуву эстрадалул вокалданул отделение тIитIинсса пикри бушиву ва тавакъю бувна Жасминнухь, ва отделениялул «цIа кусса педагог» хьунсса рязишинна дула куну.
Жасминнул бувсуна цуппа хъунма хьусса Дарбантлив дуван дакIнийсса давурттая, вайннувух дия цIусса балайлул клип ласавугу. Ахирданий министрнал хъамалудушнин пишкаш бувна Расул ХIамзатовлул луттирду ва буллуна Министерствалул чулухасса Барчаллагьрал чагъар.
Хъирив Жасмин бивуна ОьрчIал искусствардал 1-мур школалийнгу. Шикку цIа дурксса балайчи хьунабавкьуна цIу-ччатI хьхьичIну. Школалул директор Саида Исмяиловал хъамалудушнин ккаккан бувна школа, бувсуна шикку махъа нанисса никиран кIулшивуртту дулаврил даву цукун най дуссарив.
МахIачкъала шагьрулул Культуралул управлениялул начальник Фарид Абалаевлул МахIачкъала шагьрулул мэр Юсуп Умавовлул чулуха балайчинан дуллуна ХIурматрал грамота.
Бусравсса хъамалудушнин школалул тарбиялувтурал хIадур дурну дия концертрал программа. Жасминнущал цищалвагу щаллу бувна оьрчIал ванил машгьурсса балайрду.
Бадрижамал Аьлиева
