Вайннан цIа кусса гьайкаллу дацIан дурну дуссар буттал шяраваллаву.

1999 шинал август зуруй чапхунчитурал кьюкьри дурхссар ЦIумадиял ва Бущихъиял райондалийн. Республикалийсса тагьар хъинну нигьачIисса диркIссар. ЦIуссалакрал райондалий хъуннасса агьамшиву дусса «Телевышка» дуруччин аьркинсса чIалан бикIайхту, му пост тапшур бувссар кьянкьа-кьурчIисса, даврил хIал кIулсса Халид Мурачуевлуйн ва Мутай Исяевлуйн. Цикссагу гуж ххишаласса боевиктурайн данди бавцIуну, къучагъшиврий жанну дуллуссар кIинналлагу.
Аьпалул хьуну махъ Халид Мурачуевлун ва Мутай Исяевлун дуллуссар Аьрасатнал Вирттаврал цIарду.

Милицанал лейтенант Халид Мурачуевлун дахьра 27 шин диркIун дур, чIивима сержант Мутай Исяевлун – 33. Милицанай зийгу вайннал чIяру шинну хьуну къадиркIун дур. Дакъанугу, Чачаннал дазуйсса район дуну, цимилагу захIматсса, нигьачIисса ишир­ттавух гьуртту хьун багьну бивкIун бур. ХьхьичIвагу, Аьхъардал шяраваллия арх бакъасса кIанттурдай, кьюлтIницIух жулла аьрщарайн буххан кьаст лархIусса къачагътурал кьюкьлуйн данди авцIуну, Халидлун миннащал баранбал увккун талан багьну бивкIун бур. Му чIумал боевиктурава 8 ивтIусса, 7 ивщусса хьуну ивкIссар.
«Телевышкалия» битIянхърай дирхьусса кунна ЦIуссалакрал, Казбековуллал районнал шяраваллу ва Хасавюрт чIалай буссар.
КIюрххицIуннай камуфляж янналувусса инсантурал кьюкьри ккарккукун, Халид ивкIун ур цал гай федерал аьралуннал ученияртту нанисса ххай. Рациялувух ЦIуссалакрал райотделданийн оьвкукун, кIул хьуну бур райцентрданийн боевиктал ххявххун, талатавуртту най душиву. Ванайн амру бувну бур, цайми ялун бияннин, цалва гужирайну лахъазан дуруччин. Мурачуевлул махъминнахьгу бувсун бур иш-тагьар ци дуссарив. Цукун, ци зунссарив маслихIат ккавккун бур. ЦачIава бумур ярагъгу бавчIуну, гьарнал цалва-цалва кIану бувгьуну бур.
Эфирданувухсса цалла оьвчавурттан жаваб дуллалисса цукIуй акъахьувкун, къачагътал, кIучI къахъанай, тархъанну най бивкIун бур лахъазанттуйн. Цалва цIакьлийн мукIруну нанисса боевиктал хъинну гъан хьунгу бивтун, цIу дирхьуну дур милицалтрал. Хар-хавар бакъасса битавурттал гьанавиххи бувсса гай цайнма цивппа бучIаннин мадарасса кьатI бувну бур. Яла ми кIанттурдай 70 боевикнал жаназа ляркъуссар тIий, буслан бикIай. Биту-ххиту хIурхIа шайхту, боевиктурал кьаст лархIуну дур переговордайну лахъазан ласун. Цинявппагу бусурман уссурвалли тIий, ярагъ щяв биширча, милицалт цалва ххуллийх гьан битаншиву буслай бивкIун бур. Цалва тIутIимур къавхьукун, душман цамур куццуй сукку тIуншиву кIулну, жагьилсса командирнал мугьлат бакъа аьркинсса кIанттурдай бацIан бувну бур цала зузалт. Гъан бувну бур ливчIсса ярагъгу.
Медициналул кIулшивуртту дусса Халид, талайгу унува, архIала щавурду дахIлай, аьралитуран анаварсса медициналул кумаггу буллай ивкIун ур.
Талатавуртту ялу-ялун къизгъин хъанан диркIун дур. Командирнал гьарицаннахьхьун цахьхьу-цахьхьунна дуллуну дур цалчинсса медициналул кумагран аьркинмур. БувчIин бувну бур личIи-личIину талан багьантIишиву ва цIана гьарцаннал оьрму гайминнайн хъарну бушиву. Кьянкьану, нигьакъаувсун сукку тIисса командир чIалай, дакI дарцIуну бивкIун бур гаймигу. Минометирттава, пулеметирттава лахъазанттуйн цIу дирхьуну дур боевиктурал. ОкопрачIату окопрачIан лечлай, блиндажирттаву лабикIлай, жавабрансса гьужум буллай, талай диркIун дур чIирисса кьюкьа. Цала иш-тагьар дурчIлай, кумаг ялун бияншиврийн хьул къакьукьлай бивкIун бур. Амма боевиктурал лагма рургьусса райотделданул милицалт ва Липецкаллал ОМОН цивппагу бакIрая ка ларсун талай бивкIун бур. «ТелевышкалучIасса» чIирисса кьюкьлунгу анжагъ цалва гужирайну бакI бу­ккан багьлай бивкIун бур.
Гьантлул дянив «Телевышкалийн» мяйлла тIиртIуну дур артиллериялул цIу.
Ва хъуннасса агьамшиву дусса пост чара бакъа ласун аьркинну буну, боевиктурал хъунмур гуж шиккун тIайла бувну бивкIун бур. Ссятрая ссятрайн милицалт­рал гуж чан хъанан бивкIун бур.
Ахттакьун чIумалнин «Телевышкалий» ливчIун бур Халид Мурачуев ва Мутай Исяев. Лахъазанттуйнсса артиллериялул гьужумру щаллусса хьхьуну бакъавцIуну бур. Лагма щархъал агьлу, къучагъну талатиминнал мачча-гъан, бан-бит бухлавгун, микIлавчIун, чани хъя учиннин лахъазанттуя якъабатIавай бивкIун бур. ЧIун-чIумуй рациялувух баян буллалимунива кIулну бивкIун бур «Телевышкалий» кIия акъа къаливчIшиву. Халид Мурачуев эфирданийн махъа-махъ увккун ур сентябрьданул 6-нний.
«Мутайн чIярусса щавурду дирну дур. Навагу щаву дирну ура. Ца гранатарттал къурши ливчIунни. Ва МутайчIан ххюр­хху бав. Душман хъиннува гъан хьувкун, ванал дуллай, на личлай буру». Ва хьуну бур Мурачуевлул махъва-махъсса гъалгъа. Яла лахъазанттуй пахъдагьру хьуну дур.
Махъ яла боевиктураща зерххусса кассетарттай ккаккантIиссар чачаннал операторнал ларсъсса «Телевышкалул» цIанийсса къизгъинсса талатаву. Пострайнгу ка тIайла дуллай, Басаев уссар Хаттаблухь кIийми къучагъну талай бушиву буслай.
Лахъазанттуй пахъдагьру шайхту, гьантлул дянивсса талатаврил бардулт хьуминнан бувчIуссар пострай сагъсса цучIав къаливчIшиву. Боевиктурал оьхIалшиврия, жиндралшиврия баллай, кIиягу виричу миннахьхьун къаиривхьуви тIий умудрай бивкIссар.
Луглай, анжагъ ца шинава, сентябрь зурул 15-нний, ляркъуссар Халидлул ва Мутайл жаназарду цалла дуручлай бивкIсса лахъазанттуй.
КIиягу Виричунан буттал шяраваллаву дацIан дурну дуссар гьайкаллу. Вайннал цIарду дирзун дуссар школар­ттан ва кIичIираваллан.
Буслай бур Халидлул хъунмур ссу Сиянат:
-Жул кулпатраву 6 оьрчI бия – 2 арс, 4 душ. Халид ттуяр кIира шинал чIивисса ия. Дуккавривугу, спортравугу итххявх­сса икIайва. Дуклакисса шиннардий спортрал бяст-ччаллаву хьхьичIунсса кIанттурду бугьайссия. Дустал ххира­сса ия. ЧIявусса дусталгу бикIайссия. КIа иш хьун хьхьичIмур кьини кьамул бувну бия мунал лахъазанттуйсса пост. Му кьини ахттакьун чIумал му ттун даврия шавай най хьунаавкьуна. Ттулми къатригу чIаххуврайва дуссар. «Лагмара гьарзат чIалачIисса, яттикъуш кунмасса ххуйсса кIану бур», — тIий, рязину ия. Га хьхьуну ттун га шава авцIусса ххива.
Гъарал лачIун кунна дия. Гъарал лачIурча, кIийн машина къалахъайссар тIий, гава хьхьуну махъунай лавгун ия. Гьунттий кьини, лахъазанттуй талатаву дайдирхьусса чIумал, кIул хьуна ттун уссу кIий ушиву. Цукун бухьунссияв жу, инава пикри ба? Гьарца пIякьлил чурх зурзу тIутIи байва.
Цал бавуна ивкIуну ур тIисса хавар, яла — акъа хьуну ур тIар тIисса. Шин ларгун махъри лявкъусса. Му иширал хъинну лахIан бувна жул нину-ппу. 2012 шинал аьпалухьхьун ларгунни нину, 2017 шинал – ппу. Кьура шин ларгунни тания шиннай. Цими гьарчагу, лагь къахьун­ссар жул къюву.
Буслай бур Мутайл кулпат Аьбидат:
-Та дяъвилул на ласнацIагу, уссицIагу бувссара. Мутайгу, ттул уссу Аьвдулкьасингу оьрчIнияцIавасса дус­тал бия. КIиягу кьянкьа-кьурчIисса бия.Ттун Мутай та кьини лахъазанттуй къуллугъ буллай ушиву кIулссия, амма къакIулссия кIикку дяъви най бушиву. Шяраву боевиктал ккавккукун, ттун МутайчIан оьвчин ччан бивкIуна. Тани мобил телефоннугу дакъая. ЧIаххуврачIа шарда телефон дуну, оьвчин лавгра. ЩилчIав гьаз буллай бакъая. Яла-ялагу оьвтIий, ссят 11 хьусса чIун духьунссия, гьаз бувна Халидлул.
-На Аьбидат бура. ЗучIагу дяъви бурив? Зу ци зий буру? Мутай чIарах акъарив? — тIий бура.
Га аьжаивну, дакI дакъасса куна ия.
-ЖучIа гьарца зат ххуйну дур, пикри мабувара. Мутайгу чIарах акъар. Ина ххишала маоьвчара, ина жул даврихун бахчилай бура, — увкунни.
Ванийну къуртал хьуна жул ихтилат. Та кьини Мутайл хъунама уссу Заур ахчунни ттухун, оьрчIругу буца, бачу Хасаврайн тIий. Къананна, Мутайгу кьаивтун, чунна на гьайсса тIий, мютIи къавхьура. Яла махъ бувсуна Заурдул Мутайл оьвкуну бивкIшиву: «Жу шичча къаличин­ссаруча, ттул къушлилсса бува», — куну. Му иш хьуннин хьхьичI гьантрайра ттул дакIниву ца синхралшиву, гьанавиххулшиву дия.
Циваннив, ссаярив къакIулну, аьтIаву лачIлай дия. Циван аьтIий бура куну цIувххукун, учинмур бакъа, хъунма­сса хIаллай къаккавксса Туркманнавусса уссу дакIнин агьунни куссия.
Мутайл ичIува гьарзатрацIун кумаг байссия. Ва хъаннил давур, ва арамтунналли тIисса иш къабикIайссия жул къушливу. Гьарзат дайссия. Мутайн ххуйну кIула Аьра­сатнал, Дагъусттаннал тарих. Ч1явусса луттирду буккайва. Балайгу учайссия, къавтIунгу изайссия. Язи-язими зевххунни та дяъвилул жуща.
Жул кIива оьрчI буссар. Тани душнин 13 шин дия, арснан 6. ЦIана арсгу, душгу цала-цала кулпатру бувну буссар. Душнил 2 оьрчI бур. Мутайл цIа дирз­сса арснал арснан 3 шин хьуну дур.
Андриана Аьбдуллаева
№ 34,35 «Илчи», 2019 ш.