Сентябрьданул 11-нний МахIачкъалалив Дусшиврул къатраву хьунни «Экономика Дагестана: перспективы и вектор развития» тIисса экономикалул форумрал пленар заседание. Ваний гьуртту хьунни Дагъусттаннал ХIукуматрал председатель Аьбдулмуслим Аьбдулмуслимов.

Форумрал площадкалий бия ДР-лул Халкьуннал Мажлисрал председательнал хъиривчу СайгидахIмад АхIмадов, ХIукуматрал вице-премьертал, МахIачкъалаллал бакIчи Юсуп Умавов, республикалул властьрал органнал каялувчитал, муниципалитетирттал бакIчитал ва цаймигу.
Мероприятие дуллалиссар Дагъусттаннал Экономикалул министерствалун 100 шин шаврин хасну.
Форум байбивхьуна тематикалул дискуссиярттал сессияртту буллалаврийну. Шикку ххал бивгьуна регионнал дянив хIала-гьурттуну зузаврил, Гъанмур Машрикьуллал ва Дянивмур Азиянал билаятирттащал уртакьну зузаврил, прорывной проектру бартдигьлагьаврил ва цаймигу масъалартту.
Дагъусттаннал Экономикалул ва территориярттал лябуккулул министерствалул коллектив барча буллалисса видеолийсса лаизаву дурна Аьрасатнал экономикалул лябуккулул министрнал хъиривчу Сергей Назаровлул. Ванал бусаврийну, региондалул бур хъунмасса экономикалул потенциал.
Пленар сессия тIивтIуна Аьбдулмуслим Аьбдулмуслимовлул. Ванал ДР-лул Минэкономразвитиялул ветерантурахь ва зузалтрахь барча куна идаралул 100 шин шаву.
– Гьашину 100 шин хьуссар Дагъусттаннал экономикалул къуллугъну хъанай бивкIсса ПаччахIлугърал пландалул комиссия сакин бувния шийннай. Ца ттуршукулул тарихрал ххуллий ва къуллугърал бартбигьлай бивкIссар паччахIлугърал яла агьамми масъалартту – хIадур дуллай бивкIссар халкьуннал хозяйство цIу дуккан ва лядуккан даврил мероприятияртту, вайннувух дур хозяйстварттал индустриализация, пятилеткардал заданияртту биттур даву, Буттал КIанттул цIанийсса Хъун дяъвилул шиннардий къинттуллухсса давурттайн халкь кIункIу баву, дяъвилия махъсса чIумал хозяйствартту цIу дуккан даву, экономикалул реаль сектор лябуккан баву, – кунни Аьбдулмуслимовлул.
Премьернал дакIнин бивчуна личIи-личIисса шиннардий экономикалул къуллугърал каялувчиталну зий бивкIсса паччахIлугърал ишккаккулт.
Ларгсса чIумул мутталий идаралул цIа цимиллагу даххана хьуссар. ЦIанасса ппурттуву ва зий бур ДР-лул Экономикалул ва территориялул лябуккулул министерство кунма.
ДР-лул экономикалул ва территориялул лябуккулул министр ХIажи Султановлул тIимунийну, ва экономикалул форумрай гьуртту хьуну бур 1000-нниха ливчусса инсантал. Форумрай хьуну бур 7 ккуркки стол. Вайннуй видеоконференцсвязьрал низамрай гьуртту хьуну бур властьрал федерал органнал ва субъектрал органнал вакилтал, мукунма кьатIаллил билаятирттал паччахIлугъирттал вакилтал.
Султановлул тIимунийну, ккуркки столлал хIасиллайн бувну, Министерствалул анализгу дурну, хIисаврайн ласунтIиссар циняв предложенияртту ва заявленияртту ва ми диян дантIиссар форумрал гьарца гьурттучиначIан.
Форумрай махъру лавхъуна цайминналгу.