Уттигъанну Хъювхъиял шяраву лахъа-хъунну кIицI ларгунни Шяраваллил кьини. Байрандалий гьуртту хьун буттал шяравун бувкIун бия личIи-личIисса шагьрурдай ялапар хъанахъисса хъювхъи.

ХьхьичIсса кIира кьини, жямат бувккун, марцI дурна хIатталу, шяраваллил майдан ва кIичIираваллу. Шамилчинмур кьини шяраваллил майданнив байбивхьуна шадлугърал мажлис. ТIивтIуну бия авадансса ссупра. Мажлис бачин бувну бия жяматран бусравсса, махъ нанисса арамтал: отставкалийсса полковник, цIанасса ишбажаранчи, ххюва оьрчIал ппу, хIакьсса патриот Залимхан Аьлиев. Ванал кумагчину ия строительтурал «УМС – 2» тIисса хъуннасса компаниялул директор, Дагъусттаннал лайкь хьусса строитель, Дагъусттаннал бакIчинал ва ХIукуматрал, мукуна Виваллил иширттал министерствалул каялувчитурал чулухасса наградарттал заллу МахIаммад Кьурбанов.

Хъювхъиял шяраваллил тарихрая, хIакьинусса масъаларттая, хьхьичIунсса инсантурая бусласисса, шяраваллил цIа-кьини бюхттул дуллалиминнахь барчаллагь тIисса ихтилатру бувна шяраваллил Депутатътурал советрал председатель М. ХIажиевлул, Хъунисриннал советрал председатель К. Къаллаевлул, вава советрал член И. МахIаммадовлул, ЗахIматрал ветеран И. Аьлиевлул, Да­гъусттаннал лайкь хьусса строитель Ш. Къаллаевлул, Дагъусттаннал лайкь хьусса учитель А. Гъазиевлул, хъаннил чулухасса вакилтал О. Кьурбановал, Р.МахIаммадовал, Т. Муталиевал ва м.ц.
Ихтилатру къуртал хьуну махъ ххяххан бувна дучри, хъирив байбивхьуна тяхъашив­рул мажлис. Байрандалун кумагран, гьар мудан кунма, цала чулуха къяча бивххун бия СПК-лул председатель МахIач МахIаммадовлул.

Ва ххаллилсса байрандалул сакиншинначитал хьунни шяраваллил администратор А. Аьлие­ва, М. Кьурбанов, З. Аьлиев, М. АхIмадов, М. МахIаммадов, М. Ханнаев.
ЛяличIинува кIицI лаган ччива ххюра шинай Хъювхъиял шяраваллил бакIчишиву дуллалисса, щарнил лажин ххуй дан, жямат цачIун бан хIарачат буллалисса, жяматрачIагу хIурматрайсса Асият Аьлиева. Хъунмур оьрму шагьрулий лавгсса Асият, цила буттал кIанугу, буттал шяравалугу ххирашиврул, шагьрулул бигьа-рахIатсса шартIругу кьариртун, пенсиялийн буккайхту, шяравун бувкIун, шиккусса масъаларттаха зун бивкIунни. Шиккун бучIаннингу Асият личIи-личIисса жаваблувсса къуллугъирттай зий бивкIун бур. 27 шин дурну дур налоговая инспекциялий зий. Лайкь хьуну бур личIи-личIисса наградарттан. Ва хъанай бур «отличник Федеральной налоговой службы», Дагъусттаннал лайкь хьусса экономист, Аьрасатнал граждан къуллугърал 3-мур классрал советник. Лайкь хьуну бур МахIачкъала шагьрулул бакIчинал цIа кусса ссятран, ХIурматрал грамотарттан ва Барчаллагьрал чагъардан.

Налоговая службалийн бучIаннин, Асият зий бивкIун бур партиялул органнаву: Советский райкомрал инструкторну, отделданул хъунаманал хъиривчуну, МахIачкъалаллал Советский райисполкомрал хозрасчетный группалул каялувчину.
Цила ихтилатраву ванил дакIнийхтуну барчаллагь увкунни шанмагу гьантлий шаймур буллай зий бивкIсса шяраваллил жяматрахь, хаснува хIатталлив цулуй бивкIсса оьрчIахь, дука-хIачIанмуниха зий бивкIсса Г. Гъазиевахь, С. Кьурбановахь, Р. Оьмаевахь, П. Мусаевахь, А.МахIаммадовахь, Ф.ЦIаххаевахь, Р. ХIажиевахь, Х. Нахаевахь, М. Кьурбановахь, Л. ХIусайновахь, Н. Оьмаевахь.
Мажлис тяхъану, гурну лавгунни. Жяматгу, хъамалгу рязину ливчIунни.

Андриана Аьбдуллаева