Август зурул махъра-махъсса алхIаткьини ЦIуминалийсса Аьхъардал шяраву хъуннасса уттарашинна дия. Лахъа-хъунсса даражалий кIицI лаглай бия Шяраваллил кьини. Ванинсса хIадуршинна дурну, чятирду бивщуну, скамейкартту, столлу бивхьуну бия администрациялул къатрал хIаятраву.

КIюрххила баллай бия музыкалул, балайрдал, куннащал кув лечлай, тIуркIу тIутIисса оьрчIал тяхъасса чIурду. Балайрду учин, тяхъашиву дан мажлисрайн оьвкуну бия лакрал балайчитурайн. БучIан бувну бия оьрчIру бялахъан буллансса аниматортал. ЦIуминалийн бивзун махъ Шяраваллил кьини къадурсса Аьхъардал жяматрал байрандалиясса ххаришиврул хIат-хIисав дакъая.

ЧIявусса бакIрачIан бувкIсса, цимиллагу мина цIу дан багьсса ЦIуссалакрал райондалул жяматрал ляличIиссара ххаришиву дия байрандалия.
Щарнил жямат барчаллагьрай бия Шяраваллил кьини кIицI лаган сиптачиталну бувкминнайн.
Жямат цачIун батIин, дан-дитанмунил маслихIат бувансса сиптачину увккуна шяраваллил администрациялул бакIчи, АхIмадил арс ХIасан-ХIусайнов ГъазимахIаммад. Хъунма хIал къавхьуна зун гъирагу, шавкьгу дусса, ххуйсса сиптардугу, пикрирдугу бусса жагьилсса пишакарнайн Аьхъардал шяраваллил администрациялул бакIчинал къайгъурду вихшала бувну.

ХIакьинусса кьини шяраву ГъазимахIаммадлул каялувшиннаралу дурну дур жяматран мюнпат бусса цикссагу давуртту. Ва кьинисса байрангу хьуна ванал сипталийн бувну.
Байрандалий гьуртту хьун бувкIун бия архсса шагьрурдай ялапар хъанахъисса Аьхъардал жямат. Мажлис хъун буван бувкIун бия хIурмат лавайсса хъамал – ЦIуссалакрал райондалул бакIчинал хъиривчутал Амир Султанов ва Гъаирбаг Мусаев, Банайюртуллал шяраваллил бакIчи Юнус Ибрагьимов.
ЦIуссалакрал райондалул администрациялул бакIчи Мам­матIи ХIамзатовлул чулуха Аьхъар­дал жямат барча буллали­сса ихтилат бувна Амир Султановлул.
Мажлис бачин бувну ия жяматраву хIурмат-кьиматрайсса Аьлил СалихIов.
– Ххирасса Аьхъардал жямат! Ва ЦIуссаминалийн бивзун махъ шяраваллил тарихраву жямат ккуркки лаган бувну дуллалисса цалчинсса байран хъанай дур. ХIакьину жура дуллалисса даврия хъин дайдихьу хьуннав. Жяматрай аргъ дизаннав, дуллалимуницIун Аллагьнал кабакьиннав, жула жяматрал дянивсса дусшиву цIакь хьуннав. ЦачIусса ссупралулли инсантал гъан байсса. Жува цинявппа цаннан ца кIулну бикIан, ххариссагу, пашманссагу иширттай цанначIан ца бухлан, чIарав бацIлан аьркинссару. Хъинну ххариссара ва байран даврия, – увкуна Аьлил СалихIовлул.

Ихтилатру буллалими цинявппагу барчаллагьрай бия, кутIасса чIумул мутталий байран сакин дуллай, инсантал щябикIансса кIанттурду хIадур буллай бивкIсса жагьилтурайн.
ЦIуминалийсса щархъаву байранну дуллан ва халкь цачIун батIлан, Лаккуй зунттаву кунна уртту-тIутIавун дахьларгсса хъу-лухччив, арду-майданну бакъар. Мунияту, вайннан пикри хьуна цала шяраваллил тарихгу, буттахъал аьдат-эбадатругу дакIнин дичин, администрациялул къатрал хIаятраву цачIу байран дувансса.
Щарнил жяматгу, байрандалийн бувкIсса хъамалгу барча буллалисса ихтилат бувна ГъазимахIаммад ХIасан-ХIусай­нов­лул.
– Аьхъардал жямат ЦIусса­миналийн бивзун махъ шяраву укунсса байран цалчинни дуллалисса. Инсантал ххуцI хьуну бур Шяраваллил кьини даврих. ЧIявусса жагьилтал ва мюрщисса оьрчIру бур байрандалийн бавтIун. Байран даврил хъунмур мурадгу ялун нанисса никирал оьрчIру, душру куннащал кув кIул баву, миннахь адав-инсапрайсса насихIат бусаву ва жяматрал иширттавух хIала буххан бавур. Гихунмай пикрилий буру гьарица шинал август зурул махъра-махъсса алхIаткьини Шяраваллил кьини кIицI лагаван. Жяматраву цуя-ца инсан акъар дуллалимунивух гьурттушинна къадурсса. Барчаллагь учин ччай ура жул кьини хъун дан бувкIсса хъамаллурахь, байран сакин даврил иширттавух чялишсса гьурттушинна дуллай бивкIсса, ттулва чIарав бавцIусса, ци аьркинну дур, ссал кумаг бави тIий оьвтIий бивкIсса инсантурахь, – увкуна ГъазимахIаммадлул.

– Хъинну ххарину ура ттула агьулданущал, щарнил жяматращал хьунаакьин бюхъаврия. Жува бавкьуну, куннал кув бувгьуну къуццу буллай бунутIийри шяраву тамансса давуртту дузрайн дуккан дан бювхъусса. ДакI ххари хъанай дур шяраваллил цIа-кьини гьаз дансса хIарачатрай зузисса жагьилтурайн я щувкун. Укунсса чиваркIунналли жяматрал кьини лахъайсса. Жува жулва буржну ккалли буллай буру жяматрал багьу-бизулух буруган, шайсса куццуй халкьуннан хъинмур ва ххуймур буллан, мудангу вайннал чIарав бушиву ккаккан буллан. ЧIа тIий ура буттал шяраваллил агьулданун ванияр тийннайгу ххарисса кьинирду! – увкуна Москавлия жяматращал хьунаакьинсса ниятрай увкIсса Расуллул.

Аьхъардал жяматрал маслихIат бувна гьарица шинал август зурул махъра-махъсса алхIаткьини Шяраваллил кьини дуваву аьдатравун дутансса.
Ихтилатирттал лях-карах мюрщимигу, жагьилмигу, хъунимигу, лагма лавгун къавтIий, балай тIий, таза-тяхъа бувккун бия.
Ва байрандалий жяматран ххуйсса сант дагьуна цала цIуцIи кIанттурдая ва цIюрувкьусса масъаларттая маслихIат бансса.

Имара Саидова