Гьарца шинал августрал 27-нний кIицI лагайсса Аьрасатнал Кинорал кьини чIявучин музыкант, пианист хIисаврай кIулсса Хан Башировлул цIаницIунгу тIайланна дархIусса кьини дур. Кино, музыкалия махъ, ванал кIилчинмур паччахIлугъри.

Республикалул ва билаятрал магьирлугъравугу, маданиятравугу хъунмасса захIмат бувсса инсан ур Дагъусттаннал Музыкантътурал союзрал правлениялул председатель, профессор, Аьрасатнал Федерациялул искусствалул лайкь хьусса ишккакку, Дагъусттаннал халкьуннал артист, Аьрасатнал Федерациялул ХIукуматрал премиялул ва Дагъусттан Республикалул ПаччахIлугърал премиялул лауреат, пианист Баширов Хан Мирзаханнул арс.
Киноравун Хан Баширов агьну ур хар-хавар бакъа, 1981 шинал. Буттал нину Парихан аьпалул хьуну, ваних бивтсса чIирттаравусса Хан най ивкIун ур шагьрулувух аьркинсса иширай. ВаначIан гъан хьуну ур ваниннин, ванахгу бурувгун, куннащал кув бяст буллай ивкIсса кIия инсан. Вайннавасса цагу ивкIун ур цIа дурксса актер ва режиссер Александр Панкратов-Черный. Ва чIумал МахIачкъалалив Москавуллал киностудиялул ласлай бивкIун бур Алексей Толстойл «Ибикус» тIисса повестьрайн бувсса «Похождения графа Невзорова» тIисса фильм. Ванил режиссерну-постановщикнугу ивкIун ур Александр Панкратов-Черный. Хан ккавккукун, «вана ва типажри жуна аьркинсса» тIий, вай гъан хьуну бивкIун бур ваначIан.

Гьунттиймур кьини, цанна ккаккан дурсса чIумал, Къумукьнал театрданувун увкIсса Ханнан цалчин ккарккунгу дур личIи-личIисса реквизитру, кино ласласисса чIумалсса авара. Шичча байбивхьунугу бур ванал киноравунсса ххуллу. 1982 шинал билаятрал экраннайн дурккун Хан Башировгу гьурттусса «Похождения графа Невзорова» фильм.
Хан Баширов хIаласса кIил­чинсса фильм дур 1985-ку шинал ларсъсса, 1986-ку шинал экраннайн дурксса, «Сказание о храбром Хочбаре» фильм (Ленинградуллал киностудия). Режиссерну ивкIун ур жула дагъусттанлув АсхIаб Абакаров. Ва, апатI хьуну, аьпалул хьуну, фильмрал ялувсса даву щаллу дуван Ленинградрая учIан увну ур режиссер Михаил Ордовский.

1990-ку шинал, Ухссавнил АьсатIиннал киностудиялул оьвкуну, Хан Баширов гьуртту хьуну ур «Тайна рукописного Корана» фильмравух. Дагъусттаннал художественный фильмрдаву ва дакъа цамур къархьуссар Дагъусттан Республикалул ПаччахIлугърал премиялун лайкь хьусса.
1992-ку шинал Хан Баширов гьуртту хьуссар режиссер Ислам Казиевлул «Имам Шамиль» – Рай под тенью сабель» фильмравух.
Махъату, 2007-ку шинал, гьуртту хьуссар Москавуллал киностудиялул ласласисса «Платон» фильмравухгу.

Аьпа биву, ванал буттал нину Парихангу Дагъусттаннал цалчинсса художественный фильмну хъанахъисса, АхIмадхан Абу-Бакардул сценарийлийн бувну, Свердловскаллал киностудиялул 1959-ку шинал ларсъсса «Тучи покидают небо» тIисса художественный фильмраву гьуртту хьуну дур.
Хан Мирзаханович гьуртту хьуну ур 10-нния лирчусса документальный фильмравухгу. Художественный ва документальный цинярдагу аьмну хIисав дурну, 15-нния лирчусса киносуратру хъанай дур ва гьуртту хьусса. Хан Баширов ур Аьрасатнал Кинематографистътурал союзрал член.
Билаятрал кинораву бивхьусса биялсса бутIа бунугу, музыкалия махъсса кIилчинсса ипостасьну кино дунугу, ванал цува актернан ккалли уллай акъар.
– Кино – му цурдалусса, цийнура цурдасса паччахIлугъри. Сант дагьну дунура, цинявппагу кинематографистътал, кино ххирасса цинявппагу инсантал барча буван ччай ура Аьрасатнал Кинорал кьинилущал, – тIий ур Хан Мирзаханович.
Ванияр 33 шинал хьхьичI билаятрал экраннайн дурккун дур Дагъусттаннал халкьуннал чичу АхIмадхан Абу-Бакардул сценарийлийну ларсъсса «Тайна рукописного Корана» фильм. Ва дурккун 30 шин хъана­хъисса чIумал ва таварихрацIун дархIуну ва Хан Мирзахановичлул Дагъусттаннал магьирлугъ ва маданият хьхьичIуннай давриву бивхьусса хъунмасса захIматгу хIисаврайн лавсун, ванан буллуну бур Дагъусттан Республикалул культуралул министрнал чулухасса Барчаллагь.
Ванал ларсъсса дазу дакъа­сса ХIурматрал грамотарттавух ва Барчаллагьирттавух бур Аьра­сатнал Кинематографистътурал союзрал председатель Никита Михалковлул чулухасса Барчаллагьрал чагъаргу.
Ва шинал цалчинмур кьини, январьданул 1-нний, оьрмулул 70 шинал юбилей кIицI ларгсса Хан Мирзаханович ур, балики мукунсса сант дагьарчан, гъирарай дагъусттанлувнал-аксакалнал роль дугьавияв тIий.
Аьрасатнал Кинорал кьинигу барча тIий, чIа тIий буру Хан Мирзахановичлун вания тийннай вагу, цамургу рольгу дугьансса цIуллушиву, тавпикь, кинорахссагу, музыкалухссагу, аьмну оьрмулухссагу ттигу чIярусса шиннардийсса гъира-шавкь.

Бадрижамал Аьлиева