Сентябрь зурул 6-нний оьрмулул 75 шин хьунтIиссия Къяннал шяраватусса, химиялул элмурдал кандидат, ишбажаранчи, хIакьсса зунтталчу, меценат, шяраваллил жяматгу, дусталгу, Лакку кIанугу ххирасса, Къадал арс Жамалов Сулайманнун.
Вихьуллал школа марцIсса ххювардай къуртал бувсса цалчинма выпускникгу Сулайман ивкIссар. Буттал шяраву цалчин мусил медаль ларсмагу.
Ва дунияллия лавгун декабрь зуруй 4 шин хьунтIиссар. Буттал кIанттул цIанийсса Хъун дяъви нанисса ва къуртал хьуну хъиривсса шинну захIмат-жапасса, ккашилсса диркIссар. Хаснура зунттаву хъуни дакъасса шяраваллаву яхъанахъиминнан. Цукунсса захIматшивуртту дунугу, нину-ппу чялиш бувккун бивкIссар оьрчIру дуккин буван, ххуйсса пишакартал хьуншиврул вайннаяту. Школардай хIарачатрай дуклакисса оьрчIал хъунмур хиялгу бивкIссар шагьрурдайсса вузирдавун дуклан буххансса.
Сулайман оьрчIнияцIава дуккавриву итххявхсса, зат ччяни лаласайсса оьрчI ивкIссар. Вихьуллал школа марцIсса ххювардай къуртал бувсса цалчинма выпускникгу ва ивкIссар. Буттал шяраву цалчин мусил медаль ларсмагу.
– На 2-мур классраву дуклакисса чIумал, Сулайман 10-мур классраву дуклай ия. Та чIумал Вихьуллал школалий дуклай бия сайки 700-ннийн бивсса оьрчIру, так ца Вихьлияту бакъасса, лагмасса щархъаяссагу: Ссухъиятусса, Къяниятусса, ЦIуйшатусса, Хъювхъатусса, Инишатусса. Вай циняв оьрчIан эбратрансса жагьил икIайва Сулайман, дуккавривугу, спортравугу, классрал кьатIувсса давурттавугу хьхьичIун ливчусса, мяърипатрал ва тарбиялул иялсса. Учительтурангу итталу ия. Жу, гьай-гьай, гьарца ишираву ванаха лащан хIарачат буллан бикIайссияв. Ттуща дакI дарцIуну учин бюхъанссар, Сулайманнул эбратрайну чIявусса оьрчIру тарбия хьуссар куну, – буслай ур дусная Лакрал райондалул хъунама Юсуп МахIаммадов.
Сулайман дуклан увххун ур билаятрал хьхьичIунмур вузравун, Москавуллал паччахIлугърал университетравун. Вава МГУ-луву аспирантурагу къуртал бувну, ххаллилну дурурччуну дур элмурдал кандидат хьунсса диссертация. Кьура шин дурну дур ванал Дагъусттаннал медициналул университетраву химиялул кафедралий доцентну зий. Перестройкалул ччанарккусса шиннардий, бюхъулий бизнес дачин дурну, цувагу гьаз хьуну, чIявусса цалва дустурал, мачча-гъаннал кумагчи хьуну ур. Эдуард Къараханов, МГУ-лул химиялул факультетрал кафедралул хъунама, элмурдал доктор, профессор (ш. Москав) ур Сулайман цала яла ххирама аспирантъя, щалвагу факультетрангу, кафедралул коллективрангу ва хъинну ххирассия, бюхъу-гьунар бусса ва ххишала акъа хьхьичIун урувгсса инсан ия тIий.
Укун дакIнин утлай ур дус Владимир Каргинов, биотехнологиялул компаниялул элмийсса каялувчи, Вирджиния, США:
– 1967 шинал сентябрь зурул цанний жу МГУ-лул химиялул факультетрал цалчинмур курсирал студентътуравух буссияв. Сулайманнул, ттучIан гъан хьуну, часса ура куну цIувххуна. На бувсъссия аьсатIин ушиву. Цува дагъусттанчу ушивугу бувсун, гассят гьалмахтал хьуссияв, муния мукьах цIакьну дурурччуссия дусшивугу. Дуклайгу ца группалуву буссияв, яхъанайгу цачIу буссияв, студентътурал строительтурал ца кьюкьлуву зийгу. ЧIумуха лархьхьусса захIматшивурттугу дия, гьай-гьай, амма та студент замана бухьунссия оьрмулувусса яла ххуймур мутта. Общежитиялувусса жул къатлуву ччя-ччяни дустал, гьалмахтал ккуркки лагайва. Сулайманнул магьирну мандолина бищайва, на канилун дагьмуний дачIу рищайссия, Аьли, Загьир ва Тадик (жущал архIал дуклакисса) лезгинкалий къавтIий булукьайссия. Кувний жу, стипендия бавссуну лагайхту, финансирттал кIюла буккайвав. Байранну духлагайссия мукунний, нувщул диеталийн багьайссияв, нувщи 60 кIапIикIран бикIайва. Укунми иширттавугу Сулайман, хъярчру буллай, жу тяхъа буллан икIайва. Ва ия ххаришиврул энергиялул щатIив бищун буллалисса инсан. ТачIав хъамакъадитанссар цала дус Сайпуллагьлущал 2018 шинал Сулайманнул жучIа, Вашингтонная арх бакъа, дурсса кIира нюжмар. Ца кьини, Сулайманнущал ва Сайпуллагьлущал Вашингтоннай сайр буллай бунува, лухIи-пурщисса американ щарссанил жухь: «Зу циняв маччахъул бурув», – куну цIувххунни. Бакъашиву бусайхту, махIатталну цIитI диркIуна. Сулайман ия вихшаласса ккавкказ дус, цинявннан ххирасса, цинявннал чIарахацIу, чул бищай ттарцI.
Ванал дус, шяравучу, маччачу Рапи Абакаров буслай ур,
— Сулайман оьрчIнияцIава дуккавривугу, гьармунивугу итххявхсса, хьхьичIунсса оьрчI икIайва, марцIну ххювардай дуклакисса ушивруцIун, — тIий.
– Ца шинал ттуяр чIивисса унува, жул классрал циняв задачарттугу муналъя бувайсса. Райондалул математикалул олимпиадарттай хьхьичIунми кIанттурду бугьайва. МахIачкъалалив хьусса химиялул олимпиадалий цалчинмур кIану бувгьуна. Ванал чIявусса дустал бия билаятрал гьарцагу мурцIний, хIатта Американавугума. Махъсса 10 шинал лажиндарай Сулайманнул, хъинну ялув авцIуну, рынокрал экономика лархьхьуна, мудангу кIулшивуртту куртIгу, цIакьгу дуллайна икIайва. Уссур-ссуннал оьрчIал дуккаврил ялувгу авцIунува икIайва. Сулайман ия меценатгу, лакрал кказитрал, театрданул чIарав ацIайва, – тIий ур Рапи Абакаров.
Сулайманнул бусравсса биографиялуву ккалли бансса затру чIявусса бур. Ванал инсаншиву ккаккан дуллалисса.
Арсен Рамазанов, химиялул элмурдал доктор, профессор ур, 1975 шинал ссуттил, цува Москавлив МГУ-лул химиялул факультетрайн аспирантуралувун уххан увкIсса чIумал, Сулайманнул хьунагу авкьунав, цува яхъанахъисса МГУ-рал бюхттул къатравусса 15-мур зивулийсса къаттагу буллуна тIий цахьхьунма яхъанан ва экзаменнайн хIадур хъанан.
– Сулайман ттун уссугу ия, гьармуниву эбратнугу ия. Сулайман ия хIакьсса интеллигент, дурккучу. Мукунсса инсантал нажагьсса бур цIана. Цал архIал химикгу, математикгу, философгу, аьлимчугу, аькьилгу. Дазу-зума дакъа буттал аьрщигу, миллатгу ххирасса патриот ия. На мунащал кIул хьуссара 1973 шинал, тания мукьах оьнийгу, хъиннийгу, кьурчIишивурттайгу, ххаришивурттайгу цачIу бивкIссару, –тIий ур ванал дус Сайпуллагь Аьвдуразакьовгу.
Цува кIулцириннал, даврил уртакьтурал, дустурал, гъан-маччаминнал дакIурдиву укун ххуйсса инсанну личIанну оьрму бутан къабигьассар, гьай-гьай. Дунияллия лавгун мукьра шин гьарчагу, Сулайманннул цIа зумату щяв дихьлай бакъар. Хаснура ванан 75 шин хъанахъисса гьантрай, ванал уздансса тIуллая, дурцирив давурттая буслай, дакIнин утлай бур. ДакI дарцIуну бура, укунсса инсантал агьалинал дуаьрдаву личIайшиврий.
ПатIимат Рамазанова
