ЦIансса чIумал чIярусса ДТП-ртту хъанахъаврил ца багьана бур ххуллурдай чирахъру бакъашиву. ШупIиртуран, хаснува машиналул пюрунтру цIан бувминнан, ххуйну чIалай бакъар ххуллу лахълахъисса бахьттагьалт. Мукунсса тагьарданий машинартту щуну апатIру хъанай бур чIявусса инсантуран.
Укунсса иширттая шупIиртал ва бахьттагьалт буруччаву мурадрай, МахIачкъалалив январь зурул 20-нния байбивхьуну февраль зурул 20-ннийн бияннин Госавтоинспекциялул зузалтрал буллай бур «Тонировка» цIанилусса профилактикалул операция. Ххал буллай бур пюрунтру цIан бувсса ва цаймигу шупIирнан ххуллу чIалан дахшишру дуллалисса затру дусса машинартту. Мукунсса машинарттай заназисса шупIиртурал хIакъираву сакин дуллай бур материал (ст.12.5ч 3.1. Ко АП РФ).
Агана шупIир хьхьичIми кIивагу чулухсса пюрунтирттая гава цIана пленка ликкан рязи хъанай акъахьурча, инспекторнал мунахьхьун пленка букьансса чIун ккаккан дурсса чагъар булайссар. Му чIумул дянив шупIирнал инспекторнал тIалавшинна щаллу дурну дакъахьурча, шупIирнай аьчIа дишайссар 500 къурушрая 1000 къурушрайн бияннинсса ягу 15 гьантлий дуснакь айссар.
Ва операция байбивхьуния шихунмай, ашкара бувну, административ жаваблувшиннардайн бувцуну бур 1743-нния ливчусса шупIиртал. Миннава 38 шупIир МахIачкъалаллал полициялул отделлайн увцуну ур, ккаккан дурсса чIумуй пюрунтирттая пленкарду букьан къабувну тIий.
Лиана Наврузбекова,
ДПС-лул личIисса батальондалул инспектор
