![](https://ilchi.info/wp-content/uploads/sites/11/sites/11/2024/07/skanirovanie0004.jpg)
ПатIимат Гузунова, Лукьман Лукьманов, МахIаммадхIажи МахIаммадов. 1958 ш.
Шагьимардан Акниев увссар 1914-ку шинал Гъумук. Арулва классгу къуртал бувну, увхссар кIиккувасса Лакрал Педтехникумравун. Вагу къуртал бувну, зий ивкIссар ГьунчIукьатIрал школалий учительну, Гъумучиял дянивмур даражалул школалий, ялагу зий ивкIссар Педтехникумраву.
Шагьимардан Акниевлул цIа халкьуннавух машгьур хьуссар макьанну ляхъан дувуну – самодеятельный композиторну ва шаэр хIисаврай.
Музыкалухагу, литературалухагу зий хъунмасса хIал гьарчагу, печатьрай бивщусса балайрду, шеърирду ванал чIявусса бакъар. Шагьимарданнул шеърирду цал-цал бищайва «Дусшиву» альманахрай, «Зунттал хъами», «ЧIавалачин» журналлай. 1980-ку шинал Дагъучпедгизрал итабавкьуссар Шагьимарданнул «Лелуххантрал ва оьрчIал балай» тIисса шеърирдал жуж.
Совет Союзрал герб
Гъили бургъил тIинттаву
Дунъяллул ттуп бур гьанай,
ХхюкъянцIа мусил цIуку
Пар тIий бур тIинттал чаннай.
КьютIилттул авкьатращал
Мирхьирал гуж ца хьусса –
Зузалтрал ва хъузалтрал
ДахIаву дур чIурусса.
ЧIаллал лагма карусса
МарцI сунттул хIашиялийх
Гьар миллатирттал мазрай
Варакьрай бур чивчуну:
Тархъаншиврий бутансса
ХIакьсса оьрмулул цIаний
Щаллара дунияллул
ЗахIматкаш ца хьира тIий.
КуртIсса мукъурттил чаннай
Чанна лавхъсса ттул улча
Чачунгу бур пперхха тIий,
Дунъяллийх чани кIукIлай.
Барча вил гуж
ва кьуват
Шинну дур шадну чяр тIий,
Лухччи дур таза дуклай,
Тяхъа балайрдал чIурдал
ДакIру дур нацIу дуллай.
Нара-наранжи тIутIал
Инт оьрчIи дайсса кунна,
Вай цIу-цIусса шагьрурдал
Билаят бур цIу буллай.
Хьхьурайния кIюрххилнин
Урттуй хьхьем шайсса кунна,
Вай неххардий хьхьирирду
Вирттаврал бур хьун буллай.
Лухччинун цIимилийсса
РахIмат аьркинсса кунма,
Халкьуннан рахIатшиву
Ччай дур, оьрму чIюлу бан.
Барча гьарцагу байран!
Барча зузалал кьуват!
Бат хьу, атомрал дяъвий,
Зугу, дяъвирду ччимий!
Студентътурал балай
Интниву бур билаят,
ТIутIайх бур жагьил оьрму,
Гьартасса бур къатригу
Жу дуклан щябикIайсса.
Дуклай буру, зат лахьхьин,
КуртIну мяъна дурчIинну,
Жула Буттал кIанттуха
Иширайну къуллугъ бан.
Цумур-цагу сянатрал
Иялсса усттарну хьун,
КIулшилийну ххал бару
Гьарца элмулул ххару.
Ссибирнал мяъданнава,
Хъахъи къундалул чуллай,
Шагьрурдай, заводирттай
Жул оьтту буссар щарай.
Колхозрал къурув къама,
Муххал ххуллий машинтру,
Лехлан ва гьузун гъира
Жул мурадрур даимсса.
Барча зул мина
Ххирасса ттул авлахъ, гьаз хьунни вил аргъ;
Бищарду вил ялтту мусил ранг гьанна.
Ялтту хьхьев-хьхьев уча, сайраксса дюхлуй,
Миллион путайсса батIланну къама.
ТIивтIусса, гьартасса, илкинсса авлахъ,
Щуруй бур жагьилтал, виву жан дихьлай.
Луххал магъ хъиривну ссур хьу, машинай;
Никъа щи, трактор, ва авлахъ жулар.
ОьрчIрув, гьаз хьияра цал ттигу цIунил
Даимсса зулава му гъираращал.
Дакъассар цичIаргу зул хьхьичI дацIайсса,
Дарчан кьаст жагьилнал дан даву гьасса.
Параннуй, инагу чанна да хьхьурду,
Дяхттагу вийн яржа бивнува буссар,
Къушлагаву дара, цIуминачитал:
Барча зул кулпатру, барча зул мина!
Щавщигу щюлли хьунни
Щавщигу щюлли хьунни,
Щяв урттугу щап кунни,
МарцI лачIал хъуру дурчIлан
Душру къурув бувккунни.
Агь, машаллагь, марцI лачIа,
Ххявхсса саргъунну ххал ба!
МарцI лачIал хъуру дурчIлан
Душру къурув бувккунни.
Гюргу тIисса балайрдал
Ххуллулсса хIайран буллай,
Душваврал щюлли къурух
ОьрчIи накьич дирхьунни.
Агь, машаллагь, марцI лачIа,
Ххявхсса саргъунну ххал ба!
Душваврал щюлли къурух
ОьрчIи накьич дирхьунни.
Гектардая центнерду
Къалмул цуксса ласунссар,
Так хьуннав хъатIив гьарза:
ЧчатI жучIава чIявуссар.
Агь, машаллагь, марцI лачIа,
Ххявхсса саргъунну ххал ба!
Так хьуннав хъатIив гьарза:
ЧчатI жучIава чIявуссар.