Июльданул 24-нний «Дагестан» РИА-лий хьунни Дагъусттан Республикалул туризмрал ва халкьуннал художествалул промыслирдал министрнал хъиривма МахIаммад ХIабибуллаевлул пресс-конференция. Ванийсса ихтилатру хъунмурчIин хьунни республикалий турисътал кьамул баврицIун дархIусса даву «ххютула «чаннайн» дуккан давриясса, ва давриву низам дишавриясса, яни туризмрал «легализациялиясса».

Ва отрасльдануву низам дишаврия гъалгъа тIий, ва кьинисса хъамаличувнал бувчIин бувна ихтилат хьхьичIва-хьхьичI бушиву «ххютулусса» гостиницарду ва хъамаллурансса къатри чаннайн буккан баврия, цанчирча ва иширайнгу хъар хъанай дуну тIий жулла республикалийн бувкIсса туристътурал цIуллу-сагъшиврул ва оьрмулул мюхчаншиву, вай кIилчингу, шамилчингу жучIанма бучIа-къабучIаву.
МахIаммад ХIабибуллаевлул бувсуна туризм хьхьичIуннай дуван, туристътуран чара бакъа аьркинмур дузал дуван, сервис ларай дуван дуллалимуния, ва ишираву цивппа уртакьну зий бушиву личIи-личIисса министерствардащал ва ведомствардащал, туризмраву низам дишаврил бигар цайва бивхьушиву Республикалул бакIчи Сергей Меликовлул. Ва давривусса цалчинсса бигаргу бивкIшиву Сулакский каньондалий туристътал сайрданий бувцуну заназисса катердал ялтту буккаву, цанчирча шикку инсантурал цIуллу-сагъшиврун, оьрмулун зарал бивсса ишру хъанай тIий.
Ва кьинисса хъамаличувнал бувсуна ларгсса шинал, ялтту бувккун, ххал бувсса 167 объектрава налограл сияхIрай (учетрай) къабивхьусса къачансса лявкъушиву, ишбажаранчитуран цаннагу, цинявннаннагу хъиншиву «ххютула» бувккун зузаву.

Бадрижамал Аьлиева