Вай гьантрай Дарбант шагьрулий хьунни Аьрасатнал терапевтътурал ва кардиологтурал элмийсса медициналул конференция.
Шикку лайкьсса кьимат бивщунни медициналул ххуллий хъунисса хьхьичIуннайшивуртту дурсса, лавайсса жаваблувшиву дусса пиша язи бувгьусса Дагъусттаннал паччахIлугърал медициналул университетрал госпитальный терапиялул кафедралул заведующий, Дагъусттаннал халкьуннал хIакин Загълиев Сажид ХIасановичлун.
Медициналул ххуллий хъунмасса захIматрал бутIа бивхьушиврий мукIрушинна дурну, Аьрасатнал терапевтътурал элмийсса медициналул суккушиннарал президент Жанна Кобалевал Сажид ХIасановичлун дуллуна Гиппократлул орден.
Медициналуву Гиппократлул орден хъанахъиссар яла лараймур наградану. Орден цурдагу марцIсса арцуя дурсса дур.
Сажид Загълиев хъанахъиссар Дагъусттаннай цалчин ва бюхттулсса награда лайкь дурсса хIакинну. Сажидлул канила дурккун дур цикссагу элмийсса медициналул давуртту, монографияртту, луттирду. Сажид ХIасанович ур цIуллу-сагъшиву дуруччавриву хъунмасса захIмат бивхьусса медициналул корифейтуравасса ца. Ванал буниялагу хъунмасса захIмат бивхьуссар цала каялувшиннаралусса кафедралул даву лавайсса даражалийн дуцин, 60-нния лирчусса шинну хьуну дур ванал медициналул ххуллий захIмат буллай. Оьрмулул ва захIматрал ххуллий лайкь дурну дур хIукуматрал чулухасса чIярусса наградартту. ХIакьинусса кьинигу ванал сий хъуннасса дур Дагъусттаннал цIуллу-сагъшиву дуруччаврил ххуллий зузиминнал ва студентътурал дянив.
Сажид ХIасанович, дакIнийх­туну барча тIий буру вихь бюхттулсса награда. ЦIуллушиву дулуннав, уттигу вила пишалий зунсса гъира-гьавасгу бухкъаланнав!
Имара Саидова