Июль зурул 1-нний, Аьралий иширттал ветерантурал кьини, МахIачкъалалив, Къараевал Лучевой диагностикалул центрданий (Абубакарова, 22) Дагъусттаннал хIакинтурал уква кьамул бунни хасъсса аьралий операциялий щавурду дирми. Хьунабакьаврий хIукму хьунни, цанма аьралитуран бакъассагу, миннал гъан-маччанангу реабилитациялул кумаг бан, мукунма цIана хьхьичI ххуттай талатиминнан посылкартту гьан дан, аьралитурал дакI дансса чагъарду чичин.
Центрданул базалий цалчинсса реабилитациялул курс бувминнавух бия Гьавалул ва десантрал аьралуннал полковник, Десантниктурал союзрал председатель, хасъсса аьралий операциялул гьурттучи Акай Аьлиев, Дагъусттаннал ополчениялул халкьуннал Виричу, «Барс» тIисса Аьралий иширттал ветерантурал ва гьурттучитурал организациялул советрал председатель, генерал-майор Арсен Абилаев. Вайннал барчаллагь увкуна хIакинтурахь хасъсса аьралий операциялул гьурттучитурал чIарав бацIлай тIий, щавурду дирминнан ва миннал кулпатирттан кумаг буллай тIий, буллуна хIакинтуран Барчаллагьрал чагъарду.
Вай лайкь бувсса хIакинтуравух бия физический ва реабилитациялул медициналул хIакин Тутубава Башанаева, Дагъусттаннал лайкь хьусса хIакин Аьйшат Къараева, клинический психолог Александра Калина, функционал диагностикалул хIакин Жаннат Одаманова, физиотерапевт Нина Муталимова.
Тутубава Башанаевал кIицI лавгуна уттиния тихунмайгу, аьралий операция къуртал хьуну махъгу, жула аьралитуран кумаг буллан хIадурну бушиву цивппа. Аьйшат Къараевал барчаллагь увкуна аьралитурахь цала даврин бивщусса кьиматрахлу.
Июль зурул 4-нний хьуна хъиривсса прием. Центрданий аьралитал, миннал нинухъру, оьрчIру, хъами кьамул бувна психологнал, невролог-остеопатнал, гастроэнтерологнал ва цаймигу пишакартурал. ЦIуллу-сагъшиврул тагьар къулай дан бакъассагу, пишакартурал кумаг бантIиссар вайннал дакIру рахIат дуккан дангу, лахьхьин бантIиссар захIматсса чIумал цанма цала кумаг бангу.
КIицI лаган, реабилитациялул процессрал каялувчи бур «Пульс» тIисса Лазерный хирургиялул клиникалул хъунмур хIакин, невролог Тутубава Башанаева.
Андриана Аьбдуллаева
