Ккуллал райондалийсса ЧIяйннал шяраваллил Магьирлугърал къатраву хьунни Кулпатрал кьинилун хас дурсса мероприятие. Ванийн оьвкуну бия чIярусса шиннардий нахIу-х1алимну цачIу оьрму бутлатисса, чIявусса оьрчIру бусса кулпатирттайн ва хасъсса аьралий операциялул гьурттучитурал ниттихъайн.
Ва кьинисса мажлисрал бусравсса хъамаличу хьуна, хасъсса аьралий операциялул гьурттучи, Совет Союзрал Виричу ЦIаххуй Маккаевлул арснал Жяъпардул оьрчI, Даниял Маккаев. Ва Украиннал аьрщарай хасъсса аьралий операция байбивхьусса цалчинсса гьантрая шийнай, хIакьинусса кьининин, гьуртту хъанай уссар тай иширттаву. Мажлисрайн бувкIминнал бувсуна цала кулпатирттавусса тарбиялул даврия, аьдат-эбадатирттая.
Эбратну ва лайкьну оьрму бутлатисса кулпатирттан хас дурсса мероприятиялул сакиншинначину хьуна Магьирлугърал къатрал хъунмур СалихIат Алхасова. Ва байрандалул агьаммур мурадгу кулпатирттаву хьунабакьлакьисса масъалартту щаллу бан кумаг баву, чIарав бацIаву дур.
Цинявппагу шиккун бувкIсса хъамал хьунагубавкьуну, вайннахь буллалисса захIматрахлу барчаллагь тIутIисса ихтилат бувна цилва СалихIатлул:
– Кулпатрал кьини ва жула оьрмулул бивзсса гьанур, бавкьусса, цIакьсса кулпатирттахьри жула чаннасса ва ххарисса бучIантIимургу бусса. ХIакьину жучIанма хъамалу бувкIсса ниттихъул, мяйжаннугу, лайкьну оьрму бувтсса, цинявннан бусравсса ххаллилсса ниттихъулли. КIулли зун оьрчIру хъуни буллан багьшиву цукунчIавсса шартIру дакъасса захIматсса чIуннардий. Къатта-къушгу бачин бувну, хIукуматрал давурттайгу зий, оьрчIругу ччаннай бацIан буллай зу бивхьусса захIматран багьа бакъассар. Гьарцагу кулпатран чIа тIий бура талихI, тирхханну, нахIу-хIалимшиву, буллугъшиву ва цIуллушиву. Зул кулпатирттаву тачIав чан къахьуннав мюрщултрал хъяхъисса чIурду, бишиннав цинявннал оьрмурдай барачат. Хасъсса аьралий операциялул ишругу къуртал хьуну, цIуллуну-сагъну Ххувшаврищал занахьуннав жулва арсру, уссурвал ва ласру, – увкуна ванил.
Ниттихъахь барчаллагь тIутIисса асар хьунсса ихтилат бувна Даниял Маккаевлул. Аьзизсса ниттихъан хас бувсса шеърирду бувккуна дуклаки оьрчIал.
Имара Саидова
