Гъидайдихьулий зунттавун ларчIсса чявхъагъараллая хъунмасса зарал бивунни Лаккуйн нанисса ххуллурдан: чартту кьатI хьуну, валтру леркьун. Гъумукун биявайсса ххуллу, буцари хьуну, лащинсса тагьарданийн багьну бия.
Вай иширттацIун бавхIуну, Лакрал райондалийн даврил аьрххилий увкIун уссия «Дагавтодорданул» каялувчи Рустам Закариев.
Райондалул бакIчи Юсуп МахIаммадовлущалсса хьунабакьаврий «Дагавтодорданул» Лакрал райондалул отделданул каялувчи Нариман Илиясовгу гьурттуну, ххал диргьуссия, КIундиннал ламучIату байбивхьуну, Гъумукун бухлахисса кIанттайн бияннинсса ххуллул тагьар.
Ва хьунабакьаврия махъ райондалийн тIайла бувккун бия «Дагавтодорданул» комиссия ва мукунма «РСУ» АО-лул вакилтал.
НукIува кIицI лавгсса куццуй, Гъумукун бухлахисса кIанттайсса хIатталлицIухсса ххуллу, гъараллал буцари бувну, лекьлай бур. Ва тагьарданийсса участок ххуллул зузалтрал ларкьуну дур.
«Дагавтодорданул» ремонтирттал отделданул хъунама инженер Вадим МахIаммадовлущал ва «РСУ» АО-лул ремонтрал отделданул каялувчи Сапиюлла ХIусмановлущал Юсуп МахIаммадовлул ххал диргьунни ххуллу бакьин бансса план.
ХIукму хьунни, ххуллуцIухсса ххяли ххядурккун, ххуллу утта бан ва ххяли дайгьинсса чIира буван, гъараллал чIумал чартту кьатI къахъананшиврул. Ва иширал ялув х1акьину райондалийн увк1унни проектировщик. Бакьин буллай байбишин тIий бур ремонт дуллалиссаксса мутталий чIумуйну занансса ялтту ххуллу.
Мукуна Лакрал райондалийн увкIунни ДР-лул транспортрал ва ххуллурдал хозяйствалул министр Жамбулат Салавов.
Ванащалсса хьунабакьаврий х1укму бунни ЦIахъардал ламуяту Гъумукунсса ххуллул ряхра километралийх асфальт бакьин. Мукунма Гъумуча Уриннал ва Мукьардал шяраваллавух Гъунив нанисса ххуллу бакьингу бувну, ххюл бичин.
ШавкIрату Щаравсса ламул хIакъиравусса судрал хъиривлаявуртту лахъи лаглай душиврийн бувну, икьрал дурунни, ШавкIрату Щаравсса ххуллу бакьингу бувну, асфальт бакьин.
ХIадур бувссар
Зулайхат Тахакьаевал
