Июньдалул 3-нний Дагъусттан Республикалул Культуралул министерствалий хьунни фольклорданул ва аслийсса культуралул «Горцы» фестивальданул хьунийнсса пресс-конференция. Дунияллул халкьуннал дянивсса ва фестиваль жучIара кьуния шамилчинни хьунтIисса. Ванил хIакъираву гьарта-гьарзану бувсунни Дагъусттаннал культуралул министрнал хъиривмур, Республикалул Халкьуннал творчествалул къатлул директор Марита МухIадовал.
ХХIII «Горцы» фестиваль дикIантIиссар июньдалул 11-нния 16-ннийн дияннин. Ва дуллалиссар Дагъусттан Республикалул бакIчинал ва ХIукуматрал, Аьрасатнал Федерациялул Культуралул министерствалул, В.Д. Поленовлул цIанийсса Аьрасатнал Халкьуннал творчествалул къатлул чIарав бацIаврийну ва Аьрасатнал Федерациялул ЮНЕСКОлул иширтталсса буллалисса комиссиялул эгидалулу.
Гьашину фестивальданий гьуртту хьунтIиссар Беларусьнавасса, Узбакисттаннавасса, Кьиблалул АьсатIиннавасса творчествалул коллективру ва халкьуннал канил пишардал усттартал. Аьрасатналми регионная гьуртту хьунтIиссар Удмуртиянал, Къиримнал, Башкортосттаннал, Карелиянал, Бурятиянал Республикарттаясса, Ростовуллал, Липецкаллал областирдаясса, Астрахань, Кострома, Пермь, Севастополь шагьрурдаясса ва жулла республикалул муниципалитетирттаясса фольклорданул коллективру ва халкьуннал канил пишардал усттартал.
«Горцы» фестивальданул лагрулий республикалул хъуншагьрулийгу, муниципалитетирттайгу (МахIарамккантуллал, Ккуллал, Ахъушиял, Къизлардал, Хъунзахъиял, Хасавюртуллал, Буйнакскаллал районнай, Каспийск, Кизилюрт, Дарбант, Хасавюрт шагьрурдай) хьунтIиссар личIи-личIисса шадлугъру, концертру.
Фестивальданул «Дагестан встречает гостей» тIисса цIанилусса гала-концерт хьунтIиссар МахIачкъалалив М. Горькийл цIанийсса Оьруснал театрданул Хъунмур залдануву.
Фестивальданул гьантрай МахIачкъалалив С. Стальскийл паркраву, Оьруснал театрданул ва Яруссаннал театрданул хьхьичIсса майданнай дикIантIиссар усттартурал каруннил дурмунил выставкарду, халкьуннал усттартурал мастер-классру, концертру ва цаймигу шадлугъру.
Бадрижамал Аьлиева
