Вай гьантрай Апанни Къапиевлул цIанийсса Лакрал театрдануву хьунни Дагъусттаннал халкьуннал артистка Лариса ХIажиевал концерт. Ва хьунни лакрал балайгу, лакрал миллатгу лахъа-хъун бавринсса барашинна дуллалисса байранну.
Ларисал ляличIисса чIуний ва такьвалий тIутIисса балайрдаву асар хъанай дур Ватандалул дард-хажалат, пикри-хияллу, талихI-тирхханну. КIицI лаган, ванил сайки цинявппа балайрду бур лакрал машгьурсса шаэртурал мукъурттийсса.
Лариса ХIажиевал цила творчество ххираминнал хIурматран театрданул фоейраву тIивтIуну бия миллатрал аслийсса культуралия, багьу-бизулия ва халкьуннал сянатирттая бусласисса ххаллилсса майдан. Концертрайн бувкIсса тамашачитал хъамалу бан Ларисал тIивтIуну бия, жунма цинявннан ххирасса «Инт» кафелувасса, аьрайн гьавккури, инил къясру, дукьра хIан ва цаймигу лакку дукрарду дусса, авадансса ссупра.
Лариса ХIажиева ххираминнан ххаллилсса бахшишну хьунни Дагъусттаннал паччахIлугърал халкьуннал инструментирттал оркестрданухун дурсса «Зунттал душ» тIисса концертрал программа.
Лариса ца яла бусравмур балайчи бушиву исват хъанай бия ва кьини концертрайн бувкIсса лакрал бакъассагу, Дагъусттаннал кьатIувсса миллатирттаясса тамашачитурайнугу. Ванил тамашачитуравух бия бугьараминная, жагьилминная тIайла хьуну, мюрщултрайн бияннинсса оьрмулул инсантал.
Балайрдал мажлис усттарну бачин бувну ия Дагъусттаннал лайкь хьусса артист Аьбдул Мурадов. Ларисал концертрай гьуртту хьусса артистъталгу бия, цуппа кунма гьунар бусса, тамашачитуран ххира хьусса. Дагъусттаннал яла язими артистътуращал АхIмад АхIмадовлущал, Рашид Багатаевлущал, МахIаммад Абасовлущал, Зайнаб Махаеващал ва Дагъусттаннал лайкь хьусса артистътал Нурианна Къаллаеващал дунни цIу-цIусса дуэтру. Тамашачитуран ляличIину ххуй бивзунни Лариса ХIажиевал Наира Рахмановащал увкусса зунттал душнихасса балай. Ва хьхьунусса мажлисрай ххуйну кьамул унни Дагъусттаннал халкьуннал артист Аьбдулла МахIаммадмирзаев.
Цала куццуй цIу бусса хъярч-махсартту буллай, тамашачитурал хьхьичIун увккунни АхIмад АхIмадов. Ларисал ва АхIмадлул увкунни, цимил вичIи диширчангу бизар къашайсса, «АьнтIикIа» тIисса балай.
Тамашачитуран ххаллилсса бахшишну хьунни Лариса ХIажиевал Нурианна Къаллаеващал, Наира Рахмановащал ва Рашид Багатаевлущал увкусса цIусса балайрду.
Аьрасатнал халкьуннал артист, машгьурсса композитор Ширвани Чаллаевлул Лариса ХIажиеващал учайсса балай увкунни Аьбдул Мурадовлущал. Ларисал, лакку мазрай бакъассагу, увкунни яруссаннал, даргиял ва лазгиял мазурдийсса балайрдугу.
Концертрай балай увкунни, ляличIисса чIунил ва такьвалул заллу, яруссаннал балайчи МахIаммад Абасовлул.
ДакI ххари хъанай дия аслийсса лакку макьанну дагьан дурну тIутIисса, ялун нанисса жагьилсса балайчитурая. Цинявппа хIайран бунни ялун личинсса, гьунар бусса балайчи Диана Кьадинаевал. Лариса ХIажиевал сахIналий лархсса, цаннияр ца аьнтIикIасса яннарду дурурххуну дия Дагъусттаннал машгьурсса дизайнертурал –Майя Мамаевал ва Вера Огошкинал.
Шиккува кIицI къалавгун къабучIир, уттисса замана интернетрал каши, бияла хъунмасса бусса бушиву. Концертрайн бучIан къабювхъумигу соцсетирдайхчIин буруглай, Ларисал гьунардания гъалгъа тIий бия.
Концерт къуртал хьуну махъ цила чIарав бавцIусса коллегахъахь, режиссертурахь ва тамашачитурахь барчаллагь увкунни Лариса ХIажиевал.
Концерт къуртал хьуну махъгу, тамашачитал ппив хъанай бакъая, яла-ялагу лавсун най бия тIутIал кацIру, ришлай бия Лариса ХIажиеващал дакIний личIансса суратру.
Имара Саидова
