Буттал кIанттул цIанийсса Хъунмасса дяъвилуву ххувшаву ларсун 79 шин шаврин хасну щалагу билаятрай лавгунни шадлугърал мажлисру, лахъа-хъун бунни дяъвилул ветерантал. Жула республикалийгу кIицI ларгунни бюхттулсса ва байран.
Лавайсса даражалий тIайла дурккуна Ххувшаврил байран Каспийск шагьрулийгу.

Бюхттулсса Ххувшаву ласлай, талай бивкIми дакIнин бичин бувкIун бия ДР-лул ХIукуматрал председатель Аьбдулмуслим Аьбдулмуслимов, Дагъусттаннал парламентрал спикер Заур Аскандаров, ДР-лул виваллил иширттал министр Аьбдурашид МахIаммадов, Каспийскаллал Флотилиялий каялувшиву дуллалисса Александр Пешков, ДР-лул прокурор Виктор Эпп, МахIачкъала шагьрулул мэр Юсуп Умавов, 100 шинал оьрмулувусса Хъун дяъвилул ветерантал Ибрагьим-Паша Садикьов ва Муса Багьауттинов, хасъсса аьралий операциялул гьурттучитал ва бусравсса хъамал.
Парадрай каялувшиву дуллай ия Каспийскаллал флотилиялул 1-мур ранграл капитан Андрей Канищев, парад кьамул дунни контр-адмирал Олег Кривороглул.
Аьдатравун дагьсса куццуй, Ххувшаврил байран дайдирхьуна Каспийскаллал флотилиялул офицертурал Аьрасатнал Федерациялул ва Ххувшаврил Ттугъру гьаз баврийну. Тархъаншиврул цIаний жанну дуллуминнал аьпалун баян бувна минутIрайсса пахъ багьаву.
Парад нанисса майданнив тIайланнасса эфирданувух ккаккан бувна Ххувшаврил байрандалущал агьали барча буллалисса Аьрасатнал Президент Владимир Путиннул бувсса ихтилат.
Байрандалул митинг тIитIлай, ДР-лул бакIчи Сергей Меликовлул чулуха агьали барча буллалисса ихтилат бувна Аьбдулмуслим Аьб­дулмуслимовлул.
«Буттал кIанттул цIанийсса Хъун дяъвилуву жанну дуллуми дакIнин бичлачисса, миннал къучагъшивуртту абад дуллалисса байран, буниялагу, хъуннасса агьамшиву дусса хъанахъиссар. Бюхттулсса Ххувшаву ларсминнал, дяъвилул цIарава занакъавхьуминнал, къинттуллух захIмат буллай бивкIминнал дазу-зума дакъасса чувшиврийнур жущава, оьхIалсса душмангу ххит увну, Ххувшаву ласун бювхъусса.Буржлувссару жула тархъаншиврул цIаний жанну дуллусса аьралитурал аьпа абад буллан.
Хъун дяъвилул щавщи къабив­сса кулпат бакъахьунссар. КIулсса куццуй, тай шиннардий щаллусса кулпатрува хушрай дяъвилийн буцара тIий букIлай бивкIссар. Цимигу миллион халкьуннал оьрмурдацIа бувссар та дяъвилул. Дагъусттанная 180 азарахъул инсантал лавгун бур Ватан дуруччин, миннава 90 азара инсан ивкIуну ур. Ник ришлай буру дяъвилул цIараву ливтIуминнал, ятIа-тIар бакъа бакъахьуминнал ва сагъну ливчIминнал хьхьичI. Жунна ва Бюхттулсса Ххувшаву пиш-каш дурсса къучагътал мудангу дакIний личIантIиссар», – увкуна Аьбдулмуслим Аьбдулмуслимовлул.
Премьернал мукунма кIицI лавгуна, хIакьинугу жула аьралитуран цIунилгу духIан багьлай бушиву захIматсса кьинирду.
– ЦIанагу жула ниттихъал чумартну тIайла буклай бур цала арсру Украиннал аьрщарай нанисса хасъсса операциялий гьуртту хьун. СВО-лий аьралий бигарду лайкьсса даражалий бартбигьлай, ацIния цая дагъусттанлув лайкь хьунни «Аьрасатнал Виричу» тIисса бусравсса цIанин. Ссавургу, кьянкьашивугу дулуннав аьралий операциялий гьуртту хъанахъисса аьралитурахьхьун ва миннал кулпатирттахьхьун. Махъ бакъа, Ххувшавугу ласунтIиссар жура, – увкуна ванал.
Аьбдулмуслим Аьбдулмуслимовлул тIутIал кацIлищал хьунабавкьуна парадрайн бувкIсса Аьрасатнал Виричу, майор Энвер Набиевлул нину Сунна Набиева. Виричувнал ппу Альберт ва нину Сунна щябивкIун бия парадрал трибуналий бусравсса хъамаллурал дянив.
Ва кьинисса яла бусравма хъамаличу Ибрагьим-Паша Садикьовлул барчаллагь увкуна цахара дуллалисса аякьалухлу ва кIицI лавгуна Ххувшаврил байран яла кьимат лаваймур душиву.

Аьралий парадрай бувсуна, хIакьинусса кьини Дагъусттаннай ацIа ветеран ливчIун ушиву.
Аьбдулмуслим Аьбдулмуслимовлул ихтилатрая махъ, Каспийск шагьрулул майданнийх аьралий музыкалухун дачин дурна Каспийскаллал флотилиялул 136-мур гвардейский мотострелковый полкрал ва цаймигу аьралий подразделениярттал кьюкьри.
Парадрайх ларгуна бронетранспортерду, бронеавтомобильлу ва цIанасса аьралий техника. Парадрал колонналувух цалчин бия реактивный артиллериялул БМ-13 «Катюша». Хъирив бачин бувна «АХМАТ» тIисса уттизаманнул бронеавтомобильлу, БТР-70 ва БТР-80 бронетранспортерду, «Бал» ракетный комплекс, «Корвет – С» тIисса мобиль лаборатория, «ТИГР» ва «Патруль» бронеавтомобильлу.
Шиккува кIицI лаган, гьашинусса парадрай «Дагестан» РГВК-лул байрандалул съемкартту дансса камерартту бивхьуну буссия парадрай гьуртту хъанахъисса техникалуву. Техникалул колонналул каялувчину ия Каспийскаллал флотилиялул материал-техникалул щаллушиннарал командующийнал хъиривчу Михаил Мироненко.
Ахирданий Аьбдулмуслим Аьбдулмуслимовлул ссалам буллуна Каспийск шагьрулий парадрай гьуртту хъанай бивкIсса аьралитурахьхьун. Гьарица байрандалий кунна, ва кьинигу хъуннасса хъар лархъуна агьалинал мюхчаншиву дуручлачисса ихтияр дуруччай органнал зузалтрал.

Имара Саидова