Ларгсса нюжмардий шадлугърал тагьарданий дяхттасса лагерьду тIивтIунни ШавкIуллал ва Щардал школардай.

ШавкIуллал школалий «Радуга» тIисса лагерь тIитIлатIисса мероприятиялий гьуртту хьунни райондалул депутатътурал собраниялул хъунама Явсупи ХIамзаев, учительтал, дуклаки оьрчIру ва нину-ппу.
Явсупи ХIамзаевлул оьрчIру барча буллай, кIицI лавгунни гъинттулсса бигьалавгаврил агьамшиву.
«Ва лагерьданий бигьалаглай буссаксса зун лахьхьинтIиссар цIу-цIусса затру, зул дакIурдиву личIантIиссар цIу-цIусса асарду, кIул хьунтIиссару цIу-цIусса дустуращал», – увкунни ванал.

Школалул директор Асли Какваевал кIицI лавгунни лагерь хIасул бувну бушиву оьрчIру бигьагу лаган, вайннаву цIу-цIусса гьунардугу аьч бан.
«Жул мурад, зул чIун тяхъану дакъасса, зунна мюнпатну, цIусса асардал ва кIулшивурттал дурцIуну лагавур», – увкунни ванил.
ОьрчIалгу хIадур дурну дия авадансса байрандалул программа: балайрду, шеърирду, къавтIавуртту.
Лагерь «Радуга» ккаккан бувну бур 20 оьрчIан.

Щардал школалий лагерь тIивтIунни Аьрасатнал кьинилул хьунийн. ЦIагу дур ванийн бургъил кунна гъили буллали­сса – «Солнечный».
Мероприятие дайдирхьу­нни Аьрасатнал гимнрахун ттугъ гьаз баврия.
Райондалул КIулшиву дулаврил управлениялул каялувчи Сулайман Шахмиловлул барча бунни оьрчIру. ЧIа увкунни тяхъа­сса бигьалагаву, цIу-цIусса дустал ва асардай личIансса ишру.

Лагерь ккаккан бувну бур 25 оьрчIан.
Школалул директор Мариян Ибрагьимовал оьрчIру барча буллай, бувсунни щала сменалий лагерьданул программалий дикIан тIий душиву жура-журасса мероприятияртту. Шивун бухлай бур спортрал тIуркIурду, творчествалул мастер-классру, экскурсияртту, интерактив дарсру ва цаймигу хIаз-хIазсса, мюнпат бу­сса, оьрчIаву гьунарду итххя­ххан баврил ххуллийсса мероприятияртту.

Смена зун тIий бур 21 гьантлий, 8:30 ссятрая 15:00 ссятрайн бияннин.
Кьинилун дулун ккаккан дурну дур кIийлла гъилисса дукра.

Зулайхат Тахакьаева