Апрельданул 27-нний Дагъусттаннал Туризмалул ва халкьуннал художествардал промыслирдал министерствалий хьунни ванил бакIчи Эмин Мердановлул пресс-конференция.

Шикку гьаз бувсса суаллаву бия ттигъанну республикалий хьусса тIабиаьтрал бала-хатIасса иширттал туризмалун бувсса заралданиямур. Министрнал кIицI лавгунни вай иширтталшиврий республикалийн наниминнал, бучIан ччиминнал ккал, бронирование яларай дагьшиву.
-Ва чIумуйнусса захIма­т­шивур, тагьар хъин чулийннай кIура даен дуван шаймур буллай буссару. Умуд бур интнил ахирданий, гъинтнил дайдихьулий туризм махъсса шиннардий жува аьдат хьусса куццуйсса бущилийн дучIанссар тIисса, — увкунни ванал.

Пресс-конференциялий гьаз бувсса масъаларттавух бия туристътурацIун дархIусса даву «ххютулу», кьюлтIну, закондалийн къабувну щаллу дуллалиминнацIун, гидтурал ва экскурсоводтурал аттестациялуцIун бавхIумигу. Министрнал мукъурттийну учин, легальный дакъасса бизнес – му республикалул бюджетравун ялундучIия къадуркIун личIлачIимургур, туристътурал цIуллу-сагъшиврунссагу, оьр­мурданссагу нигьачIишивугур. Туристътал гьурттуну хьусса бала-апатIсса иширттава чIявумигу закондалийн къабувну зузисса туроператортурацIун бавхIусса бур. Ва ххуллийгу министерствалул дуллалисса давуртту чансса дакъар. Ларгсса шинал, масалдаран, 400-нния ливчусса объектирдайн (отельлу, гостиницарду, хъамаллуврансса къатри) тапшурлугъру дурну дур турист индустриялул объектирдал Цасса реестрданувун сведенияртту булунсса. 2025 шинал ва ххуллий къадагъа дирхьусса 410-ксса иш хьуну бур, вай, министрнал тIимунийн бувну, хъинну чIявуссар, билаятрал циняв регионнаву вайннуяр ххисса так Москавлив ва Москавуллал областьрай бусса бур. Ва даву щаллу даврийну бювхъуну бур чIявусса «кьюлтI бивхьусса» объектру закондалул ххуллий зузи буван.
Министрнал гьарта-гьарзану бувсунни Дагъусттаннал ца хъуннасса инвестицион проектраягу – Каспийскаллал прибрежный кластер баврицIун дархIуми давурттаягу. Вания хьун аьркинссар Дагъусттаннал цIусса турист инфраструктуралувусса ца яла я бацIанмур проект. Ва зунтIиссар Дарбантуллал райондалий. Ванийн бувну республикалул кьиблалийсса районнугу, шиккунсса аьрххирдугу туристътураву машгьур хъанантIиссар.

Ихтилатру ялагу хьунни тIабиаьтрал объектирдачIа къабагьавай ци-ци-дунугу дуллалаврийн, лащинсса санитар тагьарданийн багьайссагу.
Бувккунни туристътурал мюхчаншивруцIун бавхIуми масъаларттайнгу, ялу-ялун машгьур хъанахъисса паломнический туризмрайнгу, мукунма «волонтерский туризмрайнгу» – билаятрал личIи-личIисса регионная кумагран жучIанма бувкIсса волонтертурайнгу.
Хьунабакьаврил ахирданий Эмин Мердановлул барчаллагь увкунни республикалийн кьини дурксса чIумал ка-кумаг бувсса ва буллалисса экскурсоводтурахь, отельертурахь, бигьалагай къатрал заллухъруннахь, волонтертурахь, ишбажаранчитурахь ва цайминнахь.

Бадрижамал Аьлиева