Каспийскалий хьунни Дагъусттаннал Росгвардиялул управлениялул ОМОН «Скорпион-Каспий» сакин хьуну 27 шин шаврин хас дурсса шадлугърал мероприятияртту.
Шикку гьуртту хьунни Дагъусттаннал Росгвардиялул управлениялул хъунаманал хъиривчу, полициялул полковник Сакрат МахIаммадбеков, кьюкьлул командир, полициялул полковник Александр Гортыпанов, хасъсса подразделениялул ветерантал, Росгвардиялул профильданул классирттаву дуклакими, зузалтрал кулпатру, къуллугърал буржру бартбигьлай жанну дуллуминнал щахъами. Мероприятие дайдирхьунни жанну дуллусса зузалтрансса гьайкалдануцI тIутIив дишаврия. Баян бунни миннал аьпалун минутрайсса пахъ багьаву. Зузалт ва гьурттучитал барча буллалисса ихтилат бунни Сакрат МахIаммадбековлул. Цала ихтилатраву ванал кIицI лавгунни чIярусса шиннардил лажиндарай ОМОН-далул зузалтрал ккаккан дуллалисса чувшиву, вайннал пишакаршиврул даража ва къуллугърал буржру дакI марцIну бартбигьлагьишиву.
– Аьрасатнал хасъсса подразделениярттал ххаллилсса аьдат­ру дуручлай, низамрал къаралданий бавцIуну, «Скорпион- Каспий» кьюкьлул аьралитурал лайкьну бартбигьлай бур цала къуллугърал буржру региондалий бакъассагу, республикалул кьатIувгу билаятрал мурадру буручлай, халкьуннан паракьатсса оьрму дузал буллай, – увкунни ванал. Александр Гортыпановлул чIурчIав дунни спецподразделениялул зузалт цала хьхьичI бивхьусса бигарду лажин кIялану щаллу бансса даражалул бушиврий, терроризмалущал ва экстремизмалущал талатаврил ххуллий, жяматийсса низам ва халкьуннал мюхчаншиву дуручлай, вайннал хъуннасса хъар лахълай бушиврий. Бусравсса хъамаллуралгу кIицI лавгунни спецназрал зузалтрал региондалий низам ва халкьуннал ихтиярду дуручлай бигьа бакъасса къуллугърал бигарду лавайсса даражалий бартбигьлай бушиву.
Мероприятиялул лагрулий гьурттучитуран сакин дурну дия хасъсса под­разделениярттачIасса ттизаманнул техникалул ва ярагъуннил выставка. Мероприятие къуртал хьуну махъ цинявппа хъамалу бунни саллатIнал столовайлуву.
Лажин хIадур дурссар
Андриана Аьбдуллаевал