«Дагестанская правда» кказитрал редакциялий хьунни Дагъусттаннал Росгвардиялул управлениялул вневедомственный къаралданул хIаписар, полициялул подполковник ­Расул СулайманхIажиевлул брифинг

Ва хас дурну дия республикалул кIулшивуртту дулаврил идарартту террорданул иширттая мюхчан даврин. Идарарттал къатравун бувххун нанисса кIанттурдайсса металлодетекторду, леххаву дутайсса кнопкарду, хасну хIадур бувсса къарал – хIакьину вай кIулшивуртту дулаврил идарарттай чара бакъа аьркинсса затру дур. Школардугу, оьрчIал багъругу мюхчан баву хIакьину кIулшивурттал ва тарбиялул даву кунна агьамну дур.

Расул СулайманхIажиевлул бусласимунийн бувну, хIакьинусса кьини республикалул сияхIрай бур 2704 кIулшивуртту дулаврил идара. Миннува 1473 школа, 849 оьрчIал багъ, 62 колледж ва техникум ва 320 цайми идарартту. Росгвардиялул подразделениярттал къарал буллай бур 2190 идаралий, гайми Дагъусттаннал Виваллил иширттал министерствалул биялдарай дур. Цинявппагу буручлачисса объектирдай бивхьуну бур леххаву рутайсса кнопкарду, иш багьарча Росгвардиялул ягу МВД-лул вневедомственный къаралданул нарядрайн оьвчин. Леххаву дуркIун шанна минутрал дянив диян аьркинссар наряд. Экипажрал маршрут идарарттачIан гъанну дикIайссар.

– Уттинин цалагу мукунсса иш къавхьунни, ци чулийгу личIлулну бикIан аьркинссар, – увкунни хIаписарнал.
КIулшивуртту дулаврил идарартту террорданул иширттая буруччаврихлу жаваб дулайссар ми идарарттал каялувчитурал, мукунма муниципалитетрал бакIчитурал. ТIалавшиннарду къадурурччусса къуллугъчитал управлениялул жавабрайн буцайссар. Цал аьчIа дишайссар, цIунилгу мукунсса ишру хьунабакьирча уголов жавабрайн кIункIу байссар. КIулшивуртту дулаврил идарартту террорданул иширттая буруччаврил ва ми техникалул дузал баврил хIакъиравусса тIалавшиннарду цIакь дурну дуссар Аьрасатнал ХIукуматрал постановлениялий ( 2 август, 2019 шин, № 1006)
Расул СулайманхIажиевлул бусласимунийн бувну, чIявуну хьунабакьлакьисса, тIалавшиннарду къадурурччусса ишру бур хасъсса къарал ва аьркинсса техника дакъашиву. Бувагу бакъар ягу чанну бур камерарду. Росгвардиялул управлениялул ххал бигьавурттайн бувну, 114 каялувчинал хIакъиравусса материаллу мировой судирттайн тIайла дурккун дур. – Ва чIивисса процентри. Диялдакъашивуртту ялу-ялун чан хъанай дур. ЧIявуми каялувчитал жаваблувшинна дусса бур, – тIий ур хIаписар.
Ихтилат къуртал буллай, Расул СулайманхIажиевлул дакIнин бувтунни, кIулшивуртту дулаврил идарарттал мюхчаншиву ца Росгвардиялийн бакъассагу, щалагу обществалийн багьайсса масъала бушиву.
– Так цачIусса хIарачатрайнур жущава жула оьрчIру буруччин бюхъантIисса, – увкунни ванал.
Андриана Аьбдуллаева