Августрал 18-нний Москавлив, Жагьилтурал хъунмур къатлуву, хьунни регионнал дянивсса магьирлугърал фестиваль «Арцул ратIру» ( «Серебряные ручьи»).

Ваний гьуртту хьунни щалагу Аьрасатнавасса шаэртал, художниктал, музыкантътал, суратру рищулт ва цаймигу творчествалул инсантал.
Фестивальданул лагрулий хьхьичIунминнан арулла номинациялий дуллунни бахшишругу. Конкурсрай ххув хьуми ва хьхьичIун ливчуми барча бунни сахIналия Валерия Ланскаял, Александр Добронравовлул, Ольга Балашовал, цаймигу машгьурсса чаннацIурттал ва балайчитурал группардал.
Мероприятиялийн бавтI­цириннан личIинува асар хьуна СВО-лул Аьрасатнал цалчинма Виричу НурмахIаммад ХIажимахIаммадовлул буттал, шамийла Чувшиврул ордендалун лайкь хьусса полковник Энгельс ХIажимахIаммадовлул бувсса ихтилат. Ва сахIналийн уккавугу личIинува бусравну кьамулгу увна, бавтIцириннан Виричунал гьунарданул кьимат бушивугу, аьпалул хIурмат бушивугу исват буллалисса лахIза бия.
«Ккавкказуллал цинявгу агьулданиясса ссалам зуйн! Зу кунмасса патриотътал буссаксса, билаятрал иш бачинтIиссар. Цала-цала кIанттурдай, гьарма бюхъулий, хIарачатрай зурча, билаятрал цIа-кьинигу дюхъантIиссар. Аьралитал, талаталт талан аьркинссар, учительтал – лахьхьин буллан, хIакинтал – хъин буллан, шаэртал тIурча, хIакьину кунма, цала шеърирдайну талатиминнал дакI данмур чичлан аьркинссар, Аьрасатнал билаят гьаз буванмур чичлан аьркинссар. Жула билаят гужгу, цIакьгу бусса билаятри. Миллатру, динну личIи къадуллай, жува ца закканттувун кунма цачIунмай хьуну цIакьну, кьянкьану бацIан аьркинссару. БавцIунугу буссару. Жула билаят буручча тIий, Заннайн лабизлайгу буссару.
На навагу аьраличура, арсналгу вава ххуллу язи бувгьуна. Жу кIинналагу язи бувгьуссар бюхттулсса Ватан дуруччаймур пиша.
На зун цинявннан цIакьсса цIуллушиву чIа тIий ура, зул къатраву ххаришивуртту ва тяхъашивуртту чан къахьуннав тIий ура», – увкунни ванал.
2023 шиная шиннай ва фестиваль Аьрасатнал халкьуннал дянив дусшиврийсса арарду цIакь дуллалисса давур, уттимур фестиваль хьунни творчествалул ва аьпалул цашиврул лишаннугу.
Гьашину Аьрасатнал Халкьуннал цашиврул шингу духьувкун, ваниву дия цалуннасса ххуйшиву. Творчествалул, магьирлугърал инсантурал дахIавугу цIакь дуллалисса, дакIругу гъан дуллалисса.
ПатIимат Рамазанова