Дагъусттаннал БакIчи Сергей Меликовлул каялувшиврий хьу­сса ДР-лул ТЭК-рал комплексрал зузи группалул ва ЖКХ-лул объектру кIинтнийн хIадур баврил Республикалул штабрал цачIусса батIаврий ххал бивгьунни ми идарарттал дурсса давурттал масъала.

Мукунма ихтилат хьунни электросетирдал объектру, щил сияхIрай буссарив кIул бувну, цила низамрайн буцаврия ва мукунна газрал сетьругу.
Сергей Меликовлул тIи­мунийну, заллу акъасса, щил­чIав сияхIрай бакъасса электросетьру сияхIрайнгу лавсун, ми, бакьингу бувну, ишла буллалаву – ччянияцIавасса ва захIматсса масъалар. Региондалул каялувчинал муниципалитетирттал бакIчитурайн тапшур бунни миккун итадаркьуну диркIсса арцу мюнпатну харж дуллай бивкIшиврул хъирив лаян. Агарда октябрьданул 1-ннийнин му даву бакIуйн дуккан дуван къахьурча, бувсунни хъирив лаллантIишиву ихтиярду дуруччай органнугу кIункIу бувну. Дагъусттаннал БакIчинал тапшур бунни мукунма республикалул шяраваллавун газ буцаврил давурттугу бакIуйн дуккан дуван.
Ххал бигьлагьисса масъалалул хIакъираву ихтилат бунни ДР-лул энергетикалул ва ЖКХ-лул министр Ризван Мурадовлул. Мунал тIимунийну, хIакьинусса кьини 51 муниципал районнавату ва шагьрулул округирттавату электросетирдал заллушиврул хIакъиравусса сияхIру Минэнерголийн диян дурну дур дурагу 10 муниципал сакиншиндарал, ливчIминнащалсса ихтилатру ссайнчIав буклай бакъар.
Заллухъру бакъасса республикалул электричествалул ва газрал сетьру сияхIрайн ласаврил хIакъираву ихтилат бунни ДР-лул аьрщарал ва хъус-хъиншивурттал арардал министр Заур Эминовлул.