ПатIилавхъал МахIаммадал арс Аьбдуллаев ХIусайн

Август зурул 2-нний хар-хавар бакъа жуяту личIи хьунни Ккурккуллал шяравасса ПатIилавхъал МахIаммадал арс Аьбдуллаев ХIусайн.
ХIусайн увну ур 1951-ку шинал Ккурккуллал шяраву. Арулва оьрчI бусса МахIаммадал ва ПатIиматлул кулпатраву ва чIана-чIивима ия. Ккурккуллал дянивмур даражалул школагу къуртал бувну, 1972-ку шинал ХIусайн лавгун ур аьралуннаву къуллугъ бан. Армиялия увкIун махъ къуртал бувну бур Дагъусттаннал шяраваллил хозяйствалул техникум. Зий ивкIун ур Ккурккуллал Мичуриннул цIанийсса колхозрай бригадирну, кассирну, фермалул заведующийну. 1998-ку шиная шихунай Ккурккуллал школалий къаралданий зий уссия.
ХIусайн ия дакI аьчухсса, аьмал-хIал бавкьусса, чумартсса инсан. Ия хъамал ххирасса, цинявппагу цала уссур-ссу куна махъ-ихтилатрай цIу бусса. Вайннал къушлий тачIав чан къашайва бухху-букку, тIивтIунма бикIайва ссупра.
Цу учIарчагу, ванал цалагу, кулпатрал Аймисайлгу ненттабакI тIивтIуну кьамул байва. Вай бия цаннал иттав ца бурувгсса, бавкьусса лас-щар, нахIу-хIалимсса кулпат. ВайнначIан батIайва мюрщимигу, жагьилтал ва хъунимигу. ХIусайннун кIула гьарнащал цаха-цахава лавхьхьуну ихтилат бан. Аргъ дирзнасса ванал багъраву тIутIал ва ахъулссаннул мурхьирдал дянив чяйлул стакандалухун хавардай щябикIан шяравусса гьарнан ххирая. ХIусайн ия инсаннан ка-кумаг бан ччисса, ка тIиртIусса инсан, ххирасса ия шяраваллил жяматран. Мачча-гъанначIагу ванал хIурмат хъунмасса бия. Шагьрулия шяравун увкIсса цаягу инсан ваначIан къаувххун къалагайва.
ХIусайн аьпалул шаврил кьурчIишиву кIидачIлай, жижара буллай буру кулпатрахь, душваврахь, махъсса гъан-маччанахь.
Алжаннул ххари аннав, рухI бигьаний дишиннав, махъсса цинявннал оьрмурду лахъи баннав.

Ккурккуллал жямат 

МутIаллиблул арс Жабраилов МахIаммад

Оьрмулул 59 шинаву, къюкIлил цIуцIаврища уруччин къавхьуну, аьпалухьхьун лавгунни Карашрал шяраватусса МутIаллиблул арс Жабраилов МахIаммад.
МахIаммад увну ур 1967-кусса шинал Карашрал къутандалий МутIаллиблул ва Башаратлул кулпатраву. Гиккува къутандалий школагу бувккуну, зий ивкIссар колхозрал личIи-личIисса давурттай, чIавану унува кIул хьуссар ванан захIматрал кьадру.
Армиялул къуллугъгу бартбивгьуну, зана хьуну увкIун мукьах, 1995-ку шиная 2017-ку шинайн ияннин МахIаммад зий ивкIссар Дагъусттан Республикалул Росгвардиялул кьюкьлуву. Пенсиялийн увккун махъ зий уссия мюрщи-хъунисса давурттай.
МахIаммад ия цаламинналгу, чилгу дянив бусрав-сий дусса, гьарцаннащал хIал бавкьусса, дакI-аьмал уздансса инсан. Гьакссагу хIайп, оьрмулул къаувччунува лавгунни дунияллияту.
МахIаммад аьпалул шаврил пашманшивугу кIидачIлай, дакIнийхтунусса жижара буллай буру кулпатрахь Насибатлухь, арсурваврахь Аскердухь ва СалихIлухь.
Цал бунагьирттал аьпа баннав, рухI паракьатний дишиннав, махъминнал оьрмурду лахъи баннав.

Карашрал жямат