Даудлул душ
Каримова Ханича

Июльданул 26-нний, хъунмасса хIаллай къашавайгу бивкIун, аьпалул хьунни хха­ллилсса хъамитайпа Ханича Каримова. Ва бувну бур 1952 шинал МахIачкъалалив, Вилттащиял шяравасса Даудлул ва Ажай Азиевхъал чIявусса оьрчIру бусса кулпатраву.
Школа къуртал байхту Ханича бувххун бур Дагъусттаннал Медициналул институтравун, хьхьичIунну вагу къуртал бувну, 1976 шинал лавсун бур хIакин-терапевтнал диплом. ЧIярусса шиннардий зий бивкIун бур МахIачкъалаливсса личIи-личIисса поликлиникарттай, Приборостроительный заводраву цехрал хIакинну, Усру дувайсса фабрикалий, Ремзаводрай. Ванил захIматрал ххуллий хIалал бувну бур цикссагу Барчаллагьрал чагъарду ва ХIурматрал грамотартту.
Цуппа чув зий бухьурчагу, каялувчитуралгу, коллективралгу дянив ванил хIурмат лавайсса бия, къашайшалахсса ургъил ва аякьа, цила дуллалисса даврил тIалавшинна хIисаврайн лавсун, вания цIа дансса акъа къаикIайва.
Ханичал цила давугу хьхьичIунну дачин дурну, кулпатранмур чIунгу диял дайва. ГьунчIукьатIатусса ласнащал КьурбанмахIаммадлущал арс ва кIива душ ххуйсса тарбиягу дуллуну, ларайсса кIулшивурттугу ласун бувну, оьрмулул ххуллийн бивчуна. ЦIана вай бур хъинсса пишакартал хьуну, инсантуран ка-кумаг буллай.
Ханичан хъинну ххирая цила оьрчIал оьрчIру, арулагу оьрчIал хьхьичIуннайшивурттая ххаригу хъанай, вайннал чIарав мудангу бацIайва. ОьрчIал оьрчIангу ваниха чIалачIин къадикIайва.
Пенсиялийн бувккун махъгу Ханича чялишну гьуртту шайва цищала институтраву ва школалий дуклакиминнал дуллалисса давурттай ва хьунабакьавурттай. Уттигъаннугу вай цачIун бавтIун бия институт къуртал бувну 50 шинал юбилей дуван, маслихIат ккаккан. Лавмартсса азарданул къабивтунни……
Халкьуннал дянив ванил цIа лирчIунни хъин чулий кIицI лаглай: оьрмулия ххарисса, гьарцаннал чIарав бацIан хIадурсса, мукъуй цIу бусса инсанну. Укун дакIнийгу личIантIиссар ва гъан-маччанан, чIаххув-чIаравнан, дус-ихтивартуран ва даврил уртакьтуран.
Ханича дунияллия лагаврил кьурчIишивугу кIидачI­лай, дакIнийхтуну жижара буллай буру ванил ласнахь КьурбанмахIаммадлухь, уссихь Идрислухь, душваврахь Жамилахь ва Зулайхахь, арснахь Надирдухь ва цинявппагу гъан-маччанахь.
Ханича имандалий лавгун лякъиннав, алжаннул ххари баннав, ванияр тихунмай ххарисса бакъа хавар къабаяннав.

ГьунчIукьатрал
ва Вилттащиял жяматру

Ибрагьимлул душ МахIмудова Людмила

ЗахIматсса цIуцIаврил азурдагу бувну, 68 шинаву аьпалул хьунни сунбатIлищар, бахIикIладуш МахIмудова Людмила.
Ва оьрчIан ххаллилсса нинугу, ласнан хъинну бавкьусса кулпатгу буссия. Цибанссар, ванил мушакьатсса лас Кьурбангу хIайранну ливчIунни.
Людмилал бивкIулул кьу­р­чIишивугу кIидачIлай, дакI­нийхтуну жижара буллай буру Кьурбаннухь, ванал уссурваврахь МахIмудлухь ва МахIаммадлухь, ссихь Къизагъ, миннал оьрчIал душваврахь, Людмилал арсурваврахь, душнихь, мачча-гъаннахь.
Людмилал аьпа баннав, пирдавс алжан булуннав, гьав нурданул дуцIиннав.
БивкIулул кьурчIишиву ва ххажалат духIансса ссавур ва кьудрат Заннал дулуннав БахIикIуллал ва СунбатIуллал жяматрахьхьун.

СунбатIуллал жяматрал цIания МахIмуд Аьлилов 

Хъуннасса пашманшивугу кIидачIлай, дакIнийхтунусса жижара буллай буру жула даврил уртакь Андриана Аьбдуллаевахь, ванил буттауссу дунияллия лагаврийн бувну. Цал бунагьирттал аьпа баннав, рухI хъинний дишиннав, алжаннул ххари аннав. Махъминнал оьрмурдай барачат бишиннав.
«Илчи» кказитрал зузалт