Кьурбаннул душ Кьурбанова Пирдавс
Уттигъанну Каспийскалив аьпалухьхьун лавгунни пенсиялийн букканнин «Дагдизель» заводрай зий бивкIсса захIматрал ветеран, Цалчинмур ЦIувкIратусса Кьурбаннул душ Кьурбанова Пирдавс.
Бувну бур Пирдавс октябрьданул 2- нний 1942 шинал. Ва дунияллийн букканнинма аьрайн увцуну ур ппу, занагу къавхьуну ур. Пирдавсгу хъунма хьуну бур буттал лажиннагу къакIулну.
Буттал шяраву школа къуртал байхту, Каспийскалив «Дагдизель» заводрай байбивхьуну бур ванил захIматрал ххуллу, пенсиялийн букканнин хIурагу хьуну бакъар заводрая. Даву ххуйну кIулсса, жаваблувсса Пирдавс коллектираву бусравну бивкIун бур.
Ласнащал, Аьбдулаьзизлущал, ххюва душ ххаллилну тарбия бувну, чивун буккан бувну бур.
Пирдавс бия хIал бавкьусса, дакI-аьмал хъинсса, пиш тIий бакъа инсаннахь зума къабахъайсса хъамитайпа. Вайннал ужагърай тачIав хъамал чан къашайссия. Ласгу, щаргу хъамал ххирасса, мачча-гъаннал хIурмат бан чялишсса, дакIру тIивтIусса буссия.
Пирдавс аьпалул шаврил кьурчIишиву кIидачIлай , жижара буллай буру ванил душваврахь, куявтурахь, наслулухь, махъсса гъанчувнахь. Имандалий лавгун хьуннав, рухI алжаннул ххари даннав, махънал оьрмурдай барачат бишиннав.
СилахIуттиннул арс Аьбдуллаев Жабраил
Апрельданул 26-нний, оьрмулул 90-шинаву, жуятува личIи хьунни ГьунчIукьатIрал шяравасса Аьбдуллаев Жабраил СилахIуттиннул арс.
Буттал шяраву школагу къуртал бувну, ванал бувккуссия Москавливсса Щинал хозяйствалул инженертал хIадур байсса институт. Ванал агьаммур оьрму лавгссар «Главдагестанводстрой» тIисса, Дагъусттаннай яла хьхьичIунсса идаралул Технический управлениялул хъунаману. Ва къуллугърайнсса инсан цIакь айсса ивкIссар Дагъусттаннал обкомрал бюрорай ва къуллугъ цуппагу министрнал къуллугъращал архIалссаннун ккалли байсса бивкIссар.
Лахъсса даражалул пишакар ва каялувчи хIисаврай Жабраил шамийла чил хIукуматирттайн тIайла увккун ивкIссар зун. Ванал хъуннасса гьурттушинна дурссар дунияллийх цIа ларгсса Египетнавусса Асуан бартхьхьири (Асуанская плотина) буллай. Ванийн бувну, ва хIукуматрал председательнал Жабраиллун дуллуссар Египетнал паччахIлугърал медаль. Египетнаву акъассагу, ва зий ивкIссар Сириянаву ва Алжирнаву. Шиккугу Жабраиллул цала лахъсса кIулшивугу, лавайсса даражалул инженер ушивугу ккаккан бувссар. «Главдагестанводстройрая» лавгун махъ ванал ялагу тамансса шинну дурссар Баргълагавал Каспийскаллал щинал хозяйствалул идаралий инженернал къуллугърай зий ва 84 шинаву ахиргу кьариртссар хIукуматрал даву.
Жабраиллун Ватандалул ххуллий бувсса захIматрахлу дуллуну дур «Дагъусттаннал лайкь хьусса строитель», «Аьрасатнал лайкь хьусса строитель» тIисса цIарду. Вай дакъассагу ванал дур чIярусса грамотартту, барчаллагьрал чагъарду, багьа лавайсса пишкашру, дур цаппара медальлугу.
Жабраил ия хъинну дакIнил ххуйсса, инсантуращал авкьусса, гъан-маччаминнан, чIаххув-чIарахнан мудангу кумаг бан хIадурсса, ххишала акъа бусравсса инсан. Ванал цала кулпатращал хъуни бувну бур кIива душ ва ца оьрчI. ОьрчIру ччянива лавайсса даражалийсса кIулшивурттугу ларсун, цалва-цалва давурттайгу зий, кулпатирттал хьуну бур.
Жабраил аьпалул шаврил кьурчIишивугу кIидачIлай, жижара буллай буру кулпатрахь Лайлихь, арснахь Амирдухь, душваврахь Амалияхь ва Жамилахь, уссурваврахь МахIаммадлухь ва ХIусайннухь, цинявппагу махъсса мачча-гъаннахь. Цал бунагьирттал аьпа баннав, алжан нясив баннав, махънал оьрмурдай барачат бишиннав!
ГьунчIукьатIрал жяматрал цIания Зиябуттин ХIажимирзаев
Цалчинмур ЦIувкIуллал
жямат
