Мирзал арс Кьурбанов Рамазан

Вай гьантрай 40 лавхъунни ххаллилсса инсан, хъинсса дакIнил заллу, жяматрал дянив хIурмат бусса шяравучу Кьурбанов Рамазан Мирзал арс жуятува личIи хьуну.

Увну ур Рамазан ЧIяйннал шяраву 1954-ку шинал. Ниттил Издаглул хъунмасса захIмат бивхьуссар арс тарбия уллай, дуккин уллай. 1972-ку шинал ЧIяйннал дянивмур даражалул школагу къуртал бувну, Рамазан дуклан увххун ур Буйнакскаллал финансирттал техникумравун. Му къуртал бувну махъ айивхьуну ур зун Ваччавсса РКЦ-лий бухгалтернал кумагчину. Хъиривмур шинал зун ивкIун ур хъунама бухгалтерну ва му даврий зий дурну дур 20 шин. 1994-ку шиная шинай миккува начальникну зий дурссар 15 шин. Му идара лавкьуния махъ, Рамазан зий уссия райондалул ЦСОН-далул директорну.
Вай жаваблувсса давурттай зузиссаксса хIаллай Рамазаннул чIалачIи бувссар цува за кIулсса специалист ушиву. Ва ия коллективравугу хIал бавкьусса, лагма-ялттуминнал хIурмат бусса инсан. ЧIярусса шиннардий дакIнийхтуну бихьлахьисса захIматрахлу лайкь хьуссар хIурматрал грамотардан ва бахшиширттан. Ванан дуллуссар «Дагъусттан Республикалул лайкь хьусса экономист» тIисса цIа. Цала кулпат Майсаратлущал, лайкьну хъунигу бувну, дуккин бувну, цала-цала къатрай бивтссар кIия арс ва мукьва душ.
Лавгунни жула дянива ххаллилсса чув, оьрчIал ва душварал ххирасса бутта, авкьусса лас. Рамазан жуятува личIи шаврил кьурчIишиву кIидачIлай буру кулпатрахь Майсаратлухь, арсурваврахь Каирдухь ва Арсеннухь, душварахь Калиматлухь, ПатIиматлухь, Изумрудлухь, махъсса щалагу агьлу-авладрахь, гъанцириннахь. Имандалий лавгун лякъиннав, махъминнахьхьун цIуллушиву дулуннав, алжаннул ххари аннав.
ЧIяйннал жямат